बाजुरा। सुदूरपश्चिमाञ्चलको सबैभन्दा विकट जिल्ला बाजुरामा स्वास्थ्य बीमा तर्फ बीमीतहरु आकर्षण भएका छन् । सुदूरपश्चिम प्रदेशका अन्य सातवटा जिल्लाहरुको तुलनामा बाजुरामा बीमितहरु आकर्षित भएको स्वास्थ्य बीमा बोर्डको तथ्याङ्कले देखाएको छ । बाजुरा जिल्लाका जनता स्वास्थ्य बीमाका लागि अन्य जिल्लाका जनतालाई उछिन्दै सबैभन्दा अगाडि देखिएका छन् ।
स्वास्थ्य बीमा बोर्डको तथ्याङ्क अनुसार बाजुरा जिल्लामा १९ प्रतिशत जनताले स्वास्थ्य बीमामा सहभागी भएका छन् । कुल जनसङख्या एक लाख ३४ हजार ९ सय १२ रहेको बाजुरमा २६ हजार ५ सय ७४ जना स्वास्थ्य बीमामा सहभागी भएका छन् ।
त्यस्तै दोस्रोमा कैलाली जिल्ला रहेको छ । सात लाख ७५ हजार ७ सय ९ जना रहेको जनसङख्या रहेको कैलाली जिल्लामा एक लाख ३५ हजार ८३१ जना स्वास्थ्य बीमामा सहभागी भएका छन् । कैलाली जिल्लामा कुल जनसङख्याको १७ प्रतिशत जनसङख्या स्वास्थ्य बीमामा आवद्ध छन् ।
तेस्रोमा बझाङ जिल्ला रहेको छ । कुल जनसङख्याको १५ प्रतिशत मानिसहरु स्वास्थ्य बीमामा आवद्ध रहेका छन् । एक लाख ९५ हजार १ सय ५९ जनसङख्या रहेको बझाङ जिल्लामा ३० हजार १ सय २२ जना स्वास्थ्य बीमाको दायरामा रहेका छन् ।
त्यसैगरी, अछाममा १० प्रतिशत, कञ्चनपुरमा ५ प्रतिशत, बैतडीमा ४ दशमलव ७७ प्रतिशत, दार्चुलामा ४ दशमलव २६ प्रतिशत बीमीतहरु स्वास्थ्य बीमाको दायरामा रहेका छन् ।
