काठमाडौं । सिटिजन्स बैंकको १३औं वार्षिक साधारण सभा असोज १० गते हुने भएको छ । भदौ २० गते बसेको बैंक संचालक समितिको बैठकको निर्णय अनुसार सभाको मिति तय भएको हो । सभा अमृतभोक कालिका स्थान डिल्लीबजारमा विहान ९ बजे शुरु हुने जनाएको छ ।
सभा प्रयोजनाका लागि सिटिजन्सले भदौ ३१ गते मंगलबार बुक क्लोज गर्नेछ । भदौ ३० गते सम्म कायम सेयरधनी प्रस्तावित लाभांश पाउन योग्य हुनेछन् ।
बैठकले गत वर्षको वितरण योग्य नाफाबाट १२ प्रतिशत नगद लाभांश र ३ प्रतिशत बोनस सेयर गरी कुल १५ प्रतिशत लाभांश दिने निर्णय गरेको हो ।
साधारण सभाले अनुमोदन गरेपछि लगानीकर्तालाई लाभांश वितरण हुनेछ । बैंकले १ अर्ब ४५ लाख २७ हजार ७७३ रुपैयाँ बराबरको नगद लाभांश र २५ करोड ११ लाख ३१ हजार ९४३ रुपैयाँ बराबरको बोनस सेयर वितरण गर्नेछ ।
यस्तै, सभामा सञ्चालक समितिका अध्यक्षले पेश गर्ने वार्षिक प्रतिवेदन तथा २०७५–७६ को नाफा नोक्सान हिसाबकिताब सम्बन्धमा छलफल गरी पारित गर्ने एजेन्डा पनि रहेको छ ।
सभाले २०७६–७७ को लागि लेखा परीक्षकको नियुक्ति र पारिश्रमिक तोक्नेछ । उपयुक्त वित्तीय संस्थाहरु एक आपसमा गाभ्न–गाभिन परेमा प्रारम्भिक सम्झौताका लागि सञ्चालक समितिलाई अख्तिायारी दिने एजेन्डा पनि छ ।
