काठमाडौं । नेपाल धितोपत्र बोर्ड (सेबोन)ले प्राविधिक समस्या भन्दै आजको शेयर कारोबार रोकिएको विषयमा गम्भीर ध्यानाकर्षण भएको जनाएको छ।
नेपाल स्टक एक्सचेन्ज (नेप्से)ले असोज ४ गते बिहानदेखि ७२ वटा स्टक ब्रोकरको सर्भर राखिएको डाटा सेन्टमा प्राविधिक समस्या आएको भन्दै आज असोज ५ गतेको कारोबार स्थगन गरेको थियो। सोही विषयलाई लिएर धितोपत्र बोर्डले गम्भीर ध्यानाकर्षण भएको जनाएको हो।
यस विषयमा धितोपत्र बोर्डले शेयर कारोबार रोक्नुपर्ने गरी उत्पन्न विषय परिस्थितिका सम्बन्धमा आवश्यक अध्ययन तथा जाँचबुझ गरी त्यस्ता घटना पुनः दोहोरिन नदिन गर्नुपर्ने सुधारसहितको प्रतिवेदन असोज १२ गते अर्थात ७ दिनभित्र पेस गर्न निर्देशन पनि दिएको छ।
यसैगरी कारोबार स्थगनका विषयमा नेप्सेबाट जानकारी प्राप्त हुनासाथ तत्काल प्रविधिक समस्या पहिल्याउनका लागि धितोपत्र बोर्डका उपकार्यकारी निर्देशकको नेतृत्वमा ५ सदस्यीय निरीक्षण टोली खटाइएको धितोपत्र बोर्डले जारी गरेको परिपत्रमा उल्लेख छ। खटिएको टोलीबाट पेस हुने सुझावका आधारमा आगामी दिनमा शेयर बजारलाई स्वस्थ, सुरक्षित एवं पारदर्शी बनाउन थप कार्यहरु अगाडि बढाइने प्रतिबद्धता पनि धितोपत्र बोर्डले गरेको छ।
