काठमाडौं । सुपर खुदी हाइड्रोपावरको आइपीओ आज फागुन १७ गते बाँडफाँट गरिएको छ। धितोपत्र बिक्री प्रबन्धक ग्लोबल आइएमई क्यापिटलको कार्यालयमा आज बिहाा साढे ८ बजे आइपीओ बाँडफाँट गरिएको हो।
कम्पनीले गत फागुन ५ गतेदेखि ११ गतेसम्म सर्वसाधारणका लागि आइपीओ बिक्री गरेको थियो। यो कम्पनी सर्वसाधारणका लागि १०० रुपैयाँ अंकित दरका कुल १२ लाख ८६ हजार ५०० कित्ता साधारण शेयर जारी गरेको छ।
ग्लोबल आइएमई क्यापिटलका अनुसार यो आइपीओमा २६ लाख २० हजार ३४१ आवेदकबाट कुल २ करोड ८१ लाख ६४ हजार ८५० कित्ता शेयर माग भएको थियो। जसमा २५ लाख ८० हजार ४७० आवेदकबाट परेको २ करोड ७७ लाख ३ हजार ८८० कित्ता शेयर सदर भएको छ भने ३९ हजार ८७१ आवेदकबाट माग भएको ४ लाख ६१ हजार ७० कित्ता बदर भएको छ।
मागभन्दा बढी आवेदन परेका कारण यो आइपीओ पनि गोलाप्रथाबाट बाँडफाँट गरिएको छ। जसमा भाग्यमानी १ लाख २८ हजार ६५० आवेदकले १० कित्ताका दरले शेयर पाएका छन् भने सदर आवेदकमध्ये २४ लाख ५१ हजार ८२० आवेदकको हात खाली भएको छ।
यो आइपीओको अन्तिम नतिजा केहीबेरमा सार्वजनिक हुनेछ। नतिजा धितोपत्र बिक्री प्रबन्धक ग्लोबल आइएमई क्यापिटलको वेबसाइटका साथै सीडीएससीको मेरो शेयर र iporesult.cdsc.com.np मा गएर हेर्न सकिनेछ।
