काठमाडौं । सरकारी स्वामित्वको भारतीय जीवन बीमक एलआइसीले अभिकर्ताको कमिशन दर पुनरावलोकन नगर्दै निजी क्षेत्रका जीवन बीमकले पनि कमिशन दर कटाैतीको तयारी गरेका छन् ।
भारतीय अखबार बिजनेश स्टाण्डर्डको अनलाइन संस्करणका अनुसार निजी क्षेत्रका जीवन बीमकले १ अक्टुबर देखि लागू भएको समर्पण मूल्य सम्बन्धि नयाँ प्रावधानलाई ध्यानमा राख्दै सबै खाले अभिकर्ता र वितरकको कमिशन कटाैतीको तयारी गरेका हुन् ।
निजी क्षेत्रका जीवन बीमकहरूले नयाँ कमिशन दरमा एकरूपता ल्याउन र अभिकर्ता संघको संभावित विरोधको सामूहिकरूपमा सामना गर्नका लागि सहमति गर्दैछन् । उनीहरूले जीवन बीमा परिषदको बैठक डाँकेर यसबारे निर्णय लिने तयारी गरेका हुन् ।
प्रस्तावित विकल्पहरूमा वितरित कमिशन फिर्ता असुल्ने, कमिशन वितरण दरलाइ टुक्रयाउने र कटाैती गर्ने छन् । सबै जीवन बीमकको अभिकर्ता र वितरकले प्राप्त गर्ने कमिशन दरमा एकरूपमा ल्याउनका लागि निजी क्षेत्रका जीवन बीमकले यसरी सामूहिकरूपमा निर्णय गर्न लागेको भारतीय सञ्चारमाध्यमले उल्लेख गरेका छन् ।
कमिशन वापतको रकम फिर्ता असुली गर्ने प्रावधान लागू गरेर जीवन बीमकले जीवन बीमाको गलत बिक्रीलाइ अंकुश लगाउन र बीमितलाइ पूर्ण जानकारी दिएर मात्र बीमालेख बिक्री गरिएको सुनिश्चित गर्न सहयोग पुग्ने अपेक्षा गरेका छन् ।
भारतको सबैभन्दा ठूलो जीवन बीमक एलआइसीले पहिलो वर्षको कमिशन दरलाई २५ बाट २० प्रतिशत र बोनश दरलाई १० बाट ८ प्रतिशतमा झारेको छ।
भारतीय बीमा नियामकले बीमितको हितलाई ध्यानमा राख्दै विशेष समर्पण मूल्य सम्बन्धि प्रावधान लागू गरेको छ। अक्टुबर १ तारेखदेखि लागू गरिएको प्रावधान अनुसार पहिलो वर्षको बीमा किस्ता भुक्तानी गरेको भएपनि बीमितले समर्पण मूल्य दाबी गर्न पाउनेछन्।
नेपालमा बीमितले कम्तीमा ३ वर्षसम्मको बीमा किस्ता भुक्तानी नगरेसम्म सावधिक जीवन बीमालेखमा कुनै पनि समर्पण मूल्य दाबी गर्न सक्दैनन् ।
