काठमाडौं, वैशाख ९ । नयाँ वर्ष लागेदेखि नै लगातार बढेको नेप्से यो साताको पहिलो दिन ५० अंकले बढेको छ । यसदिन बजार ५० दशमलव १८ अंकले बढेर १ हजार ४ सय ३८ दशमलव ४९ को बिन्दुमा पुगेको छ ।
कारोबारमा आएका सबै समूहमा हरियाली छाएसँगै समग्र बजार उच्च अंकले बढेको हो । जसमध्ये आज बीमा समूह सर्वाधिक अंकले बढेको छ । यसदिन बीमा ३५२ दशमलव ९९ अंकले बढेको हो । त्यस्तै लघुवित्त १०० दशमलव २३ अंकले उकालो लागेको छ ।
बैंक तथा वित्तीय संस्थाको तेस्रो त्रैमासिक रिपार्ट सकारात्मक देखिएको साथै लगानीकर्ताको लागि निकै चासो रहेको पूर्ण अनलाईन कारोबार प्रणाली आउनेमा लगानीकर्ता विस्वस्त हुँदा बजार उच्च अंकले उकालो लागेको बताइएको छ ।
परिसुचकमा उच्च वृद्धिसँगै कारोबारले पनि अर्ब नाघेको छ । नयाँ वर्षसँगै दैनिकजसो अर्ब बढीको कारोबार भएको बजारमा आइतबार १६७ कम्पनीको १ अर्ब २३ करोड ५ लाख ३ हजार १८० रुपैयाँको सेयर किनबेच भएको छ । गतसाताको अन्तिम दिन बिहीबार बजारमा १ अर्ब ११ करोडको सेयर खरिदबिक्री भएका थिए ।
आज सबैभन्दा बढी कुमारी बैंकको सेयर कारोबार भएको छ । बैंकको ५ करोड ३९ लाख रुपैयाँभन्दा बढीको सेयर कारोबार भएको हो । त्यसैगरी, राष्ट्रिय बीमा कम्पनीको संस्थापक सेयर ४ करोड ४० लाखभन्दा बढीको किनबेच भएको छ ।
आइतबारको सेयर कारोबारमा चार कम्पनीको सेयर मूल्य १० प्रतिशतले बढेको छ । अस्ण काबेली पावर लिमिटेड, एनएमबि माइक्रोफाइनान्स, राष्ट्रिय बीमा कम्पनीको सेयर मूल्य १० प्रतिशतले बढेको हो । त्यसैगरी नेसनल माइक्रोफाइनान्स, वित्तीय संस्था, सिद्धार्थ इन्स्योरेन्स, वोमी माइक्रोफाइनान्स लगायतका कम्पनीको सेयर भाउ पनि करिब १० प्रतिशतले बढेको छ ।
त्यसैगरी, सर्वाधिक गुमाउनेमा भने आज रिडि हाइड्रोपावर डेभलपमेन्टको सेयर मूल्य सबैभन्दा बढी ३ दशमलव ३५ प्रतिशतले घटेको छ । ५० अंकले नेप्से परिसुचक उकालो लाग्दा ११ कम्पनीको सेयर मूल्य घटेको हो ।
