काठमाडौं । स्वास्थ्य बीमा बोर्ड मार्फत् संचालन भइरहेको स्वास्थ्य बीमा कार्यक्रमवापत संकलित बीमाशुल्कको हिसाबकिताब गोलमाल देखिएको छ ।
महालेखा परीक्षकले गरेको लेखा परीक्षणको क्रममा लेखा शाखाबाट प्राप्त तथ्यांक र सूचना प्रणालीबाट प्राप्त तथ्यांक मेल नखाएको हो ।
बोर्डले बीमा कार्यक्रममा आवद्ध सर्वसाधारणबाट आ.व. २०७७।७८ मा बीमाशुल्कवापत ४ अर्ब ४ करोड ४७ लाख रुपैयाँ संकलन गरेको एकीकृत सूचना प्रणाली सफ्टवेयरमा उल्लेख छ । तर लेखा शाखाले उपलब्ध गराएको तथ्यांकमा बीमाशुल्कवापतको आम्दानी जम्मा ३ अर्ब ६७ करोड ५९ लाख रुपैयाँ देखाएको छ ।
त्यसैगरी दाबी भुक्तानीवापतको खर्च लेखा शाखाले ४ अर्ब ८२ करोड ८९ लाख रुपैयाँ उल्लेख गरेको छ । एकीकृत सूचना प्रणाली सफ्टवेयरका अनुसार दाबी भुक्तानीवापतको खर्च ४ अर्ब ८३ करोड ४८ लाख रुपैयाँ रहेको छ ।
लेखा शाखा र सूचना प्रणाली सफ्टवेयरमा फरक फरक तथ्यांक देखिएको हुँदा हिसाबमा गोलमाल भएको हो । महालेखा परीक्षकले लेखा शाखा तथा सूचना प्रणालीले देखाएको फरक हिसाब सम्बन्धमा यकीन गरिनुपर्ने सुझाव दिएको छ ।
