काठमाडौं । बीमा समितिले माग गरेको शैक्षिक योग्यता सम्बन्धी विवरण आज सबै बीमकहरुले बीमा समिति समक्ष पेश गर्दैछन् ।
समितिले शैक्षिक योग्यतासम्बन्धी विस्तृत विवरण माग गरेपछि बीमा कम्पनीमा विशेष प्रभावको आधारमा जागिर पाएका नक्कली प्रमाणपत्रधारीहरुबीच खैलाबैला मच्चिएको छ । बीमा समितिले झण्डै दशकपछि शैक्षिक योग्यताको विषयमा बीमा कम्पनीहरुसँग विस्तृत विवरण माग गरेको हो ।
यो एक दशकको अवधिमा शैक्षिक योग्यता नभए पनि विशेषगरी भारतीय उच्च विद्यालय वा विश्वविद्यालयको नाममा बनाइएको नक्कली शैक्षिक प्रमाण पत्र पेश गरेर जागिरको अवसर पाएका वा पद्दोन्नती पाएकाहरुको जागिर धरापमा परेको छ ।
बीमा समितिले शैक्षिक योग्यता सम्बन्धी विवरणको आधारमा शंकास्पद देखिएका कर्मचारीहरुको हकमा बीमा कम्पनीहरुसँग थप विवरण माग गर्न सक्नेछ ।
विदेशी बोर्ड वा विश्वविद्यालयबाट शैक्षिक प्रमाण पत्र हासिल गरेका कर्मचारीहरुको हकमा नेपाली समकक्षतासम्बन्धी विवरण समेत खुलाउन बीमा समितिले निर्देशन दिएको छ । राष्ट्रिय परिक्षा बोर्ड, त्रिभूवन विश्वविद्यालयलगायत अन्य विश्वविद्यालयबाट समकक्षता प्राप्त गरेका कर्मचारीहरुको हकमा समकक्षता प्राप्त गरेको मिति समेत उल्लेख गर्नुपर्ने निर्देशनमा उल्लेख छ ।
केही विदेशी विश्वविद्यालयको नेपालस्थित शाखाहरुबाट वा विदेशी खुल्ला विश्वविद्यालयबाट शैक्षिक योग्यता हासिल गरेका र केही प्राविधिक विषयहरुको शैक्षिक योग्यता सम्बन्धमा नेपालमा समकक्षता उपलब्ध छैन । यस्तो विश्वविद्यालयबाट औपचारिक अध्ययन पुरा गरेर परिक्षामा सहभागी भई शैक्षिक योग्यता हासिल गरे पनि समकक्षता भने उपलब्ध नभएको अवस्था हुन्छ । बीमा समितिले समकक्षता भएको अवस्थामा समकक्षता उल्लेख गर्न निर्देशन दिएको हो ।
