काठमाडौं । नमोबुद्ध नगरपालिकाले कृषि तथा पशुपन्छी बीमाको बीमा शुल्कमा नगपालिकाको तर्फबाट १० प्रतिशत अनुदान दिने प्रतिवद्धता व्यक्त गरेको छ । नगरपालिकाका जनप्रतिनिधि तथा प्रमुख प्रशासकिय अधिकृत राजन पौडेलले नेपाल सरकारकाले दिइरहेको ८० प्रतिशत बाहेक थप १० प्रतिशत नगरपालिकाको तर्फबाट आफ्ना कृषकहरुलाई दिने प्रतिवद्धता व्यक्त गरेका हुन् । यसका लागि उनिहरुले बीमा समिति सँग आवस्यक समन्वयका लागि अनुरोध समेत गरेका छन् ।
बीमा समितिले आज नगरपालिकामा बीमा सम्बन्धी जनचेतना मुलक अन्तर्क्रिया तथा छलफल कार्यक्रम सम्पन्न गरेको छ । कार्यक्रममा बीमा समितिका निर्देशक कमल रेग्मी, सहायक निर्देशक पुर्ण बहादुर थापा र सहायक प्रथम श्याम सुन्दर नगरकोटीको सहभागिता रहेको थियो । निर्देशक रेग्मीले कार्यक्रममा बीमा सम्बन्धी जानकारीमुलक प्रस्तुतिकरण दिनुका साथै स्थानीय निकायका पदाधिकारीहरु सँग आफ्नो सेवा सुविधामा बीमालाई पनि टाइअप गर्न अनुरोध गरेका थिए । यसै क्रममा स्थानीय निकायका पदाधिकारीहरुले कृषि तथा पशुपन्छी बीमाको बीमा शुल्कमा कृषकहरुलाई अनुदान दिने प्रतिवद्धता व्यक्त गरेका हुन् ।
प्रशासकिय अधिकृत पौडेलले यस क्षेत्रमा कृषि बीमाको लागि आवस्यक प्राविधिकको समेत व्यवस्था गरिदिन अनुरोध गरेका थिए । नगरपालिकाका मेयर टिपि शर्मा तथा उपमेयरको उपस्थिति थिएन । कार्यक्रममा सहभागिहरु मध्ये अधिकाम्सले कृषि बीमा गर्न जति सजिलो छ दाबी पाउन त्यो भन्दा धेरै गुणा गाह्रो परेको भन्दै गुनासो गरेका थिए । यहाँ पनि सहभागीहरुले कोरोना बीमाको दाबी भुक्तानीलाई लिएर प्रश्न गरेका थिए ।
