काठमाडौं । इङ्गवा जलविद्युत् आयोजनामा बैंक अफ काठमाण्डूले लगानी गर्ने भएको छ । बैंक र इङ्गवा जलविद्युत् लिमिटेडबिच अपर इङ्गवा जलविद्युत् आयोजनामा कर्जा प्रवाह गर्ने सम्बन्धी सम्झौता भएको हो ।
९.७ मेगावट उत्पादन क्षमता रहेका अप्पर इङ्गवा जलविद्युत आयोजनाको अनुमानित खर्च १ अर्ब ९५ करोड रुपैयाँ रहेको छ । इङ्गवा जलविद्युत लिमिटेडले ताप्लेजुब र पाँचथर जिल्लाको याबबाराक र सिदिबबा गाऊँपालिकामा उक्त जलविद्युत आयोजनाको निर्माण कार्य गरिरहेको छ । उक्त आयोजनामा बैंक अफ काठमाण्डूको एकल लगानी रहने भएको हो।
आयोजनामा कुल लागतको ७५ प्रतिशत बैंक कर्जा बापतको लगानी रहनेछ भने बाँकी २५ प्रतिशत इङ्गवा जलविद्युत् लिमिटेडको लगानी रहनेछ ।
आयोजना पूरा भएपछि उत्पादित विद्युत् अमरपुर सवस्टेसनमा जोडिनेछ । सबस्टेसनसम्मको आवश्यक १६ किलोमिटर लामो ३३ केभी प्रसारण लाइन कम्पनी आफैले निर्माण गर्नेछ ।
यस कर्जा लगानी पश्चात् यस जलविद्युत आयोजना निर्माणमा सहयोग पुग्ने र समयसिमामा नै आयोजनाको निर्माण कार्य सम्पन्न हुने विश्वास बैंकले लिएको छ ।
