काठमाडौं । सेञ्चुरी कमर्सियल बैंकले पर्साको सखुवा प्रसौनी गाउँपालिका–४ देवरवानामा शाखारहित बैंकिङ सेवा सुरु गरेको छ । शाखारहित बैंकिङ सेवाको उद्घाटन प्रदेश २ का सभासद् मन्जुर आलम र सखुवा प्रसौनी गाउँपालिका अध्यक्ष प्रदीप जयसवालले संयुक्त रूपमा उद्घाटन गरे ।
कार्यक्रममा गाउँपालिका अध्यक्ष जयसवालले पर्साको पुरानो बजार देवारवानामा शाखारहित बैंक सेवाबाट स्थानीयले वित्तीय सेवा प्राप्त गरी आर्थिक समृद्धिमा सहयोग पुग्ने बताए ।
शाखारहित बैंकिङ सेवाबाट ग्राहकले निक्षेप संकलन, रकम भुक्तानीलगायत सेवा लिन सक्ने बैंकले जनाएको छ । कार्यक्रममा बैंकका प्रदेश २ प्रमुख सौरभ चौधरी, आदर्शनगर शाखाका प्रमुख शिवनाथ साह, लिंकरोड शाखा प्रमुख सुरेश साह उपस्थित थिए ।
हाल बैंकले १ सय २० शाखा, १० एक्सटेन्सन काउन्टर, २३ शाखारहित बैंकिङ र ८८ एटिएममार्फत वित्तीय सेवा दिँदै आएको छ ।
