काठमाडौं । नेपाल वेयरहाउजिङ कम्पनी लिमिटेडले आइपीओ निष्काशन गर्नका लागि नियामक निकाय नेपाल धितोपत्र बोर्ड सेबोनबाट अनुमति पाएको छ । सेबोनले असोज १० गते कम्पनीलाई १३ करोड ६५ लाख रुपैयाँबराबरको आइपीओ निष्काशन गर्न अनुमति दिएको हो । अब कम्पनीले १०० रुपैयाँ अंकित दरका कुल १३ लाख ७५ हजार कित्ता आईपीओ सर्वसाधारणमा बिक्री गर्नेछ ।
कम्पनीले पहिलो चरणमा कुल शेयर संख्याको १० प्रतिशत शेयर नेपाल सरकारको सम्बन्धित निकायबाट श्रम स्वीकृति प्राप्त गरी विदेशमा बसी रोजगारी गरिरहेका नेपालीका लागि जारी गर्नेछ । त्यसपछि दोस्रो चरणमा सर्वसाधारणका आईपीओ निष्कासन गर्नेछ । कम्पनीको आइपीओ बिक्री प्रबन्धकमा हिमालयन क्यापिटल लिमिटेडको रहेको छ ।
यस कम्पनी निम्बस ग्रूप अन्तर्गतको पब्लिक कम्पनी हो । कम्पनीले हेटौंडा, वीरगञ्ज, बाराको जितपुर, कोहलपुर, कपिलवस्तु र इटहरीमा खानेतेल, पीठो, पशुपन्छीको दाना, पिनाको विक्रीवितरण तथा अन्न भण्डारण गर्दै आएको छ ।
