काठमाडौं । नेपाल बीमा प्राधिकरणले जीवन बीमकहरुसँग जीवन बीमा व्यवसायका सम्बन्धमा समसामयीक विषयमा अन्तरक्रिया गर्ने भएको छ । प्राधिकरणले आगामी शुक्रबार जीवन बीमकको सञ्चालक समितिका अध्यक्ष र प्रमुख कार्यकारी अधिकृतसँग सामूहिक अन्तरक्रिया गर्न लागेको हो ।
अन्तरक्रिया कार्यक्रम दिउँसो ४ बजे होटल एयरपोर्ट सिनामंगलमा आयोजना हुने प्राधिकरणले जारी गरेकाे सूचनामा उल्लेख छ । जीवन बीमा कम्पनीबीच हालै सम्पन्न मर्जर पछि पूँजी वृद्धि, जनशक्ति व्यवस्थापन र शाखा समायाेजन, दाबी व्यवस्थापन, पुनर्बीमा व्यवस्थालगायतका विषयमा अन्तरकृया हुनेछ । यसबाहेक बीमा दाबी र व्यतित बीमालेखका सम्बन्धमा पनि छलफल हुने अपेक्षा गरिएकाे छ।
साथै जीवन बीमककाे तर्फबाट चुक्ता पूँजी वृद्धिका लागी प्राधिकरणले राइट शेयर जारी गर्न दिने नदिने, कुन हदसम्म दिने र अभिकर्ता इजाजत पत्र सम्बन्धी प्रस्तावित प्रावधानहरू कहिलेबाट लागू हुने विषय पनि अन्तरक्रियाका क्रममा प्राधिकरण समक्ष जिज्ञासा हुन सक्नेछ।
प्राधिकरणले पूँजी वृद्धि र मर्जर पछिकाे अवस्थाबारे बीमककाे पृष्ठपाेषण लिने र नियामककाे तर्फबाट सहजीकरण गर्नुपर्ने विषयमा जानकारी लिन अन्तरकृया उपयाेगी हुने अपेक्षा राखेकाे छ। प्राधिकरण अध्यक्ष सूर्य प्रसाद सिलवालले जीवन बीमककाे मर्जर अनुभव र समसामयीक विषयका सम्बन्धमा अन्तरक्रिया केन्द्रीत रहने जानकारी दिएका छन् । उनले भने, पूँजी वृद्धि र मर्जरपछि जीवन बीमककाे अवस्था के कस्ताे छ भन्ने बारे प्रष्ट हुन चाहेका छाैं।
जीवन बीमा कम्पनीमा अहिले पुनर्बीमा निर्देशिका २०८० काे प्रावधानहरू सबैभन्दा ठूलाे चासाे र चिन्ताकाे विषय बनेकाे छ । विश्वका उत्कृष्ट पुनर्बीमकलाई राेज्ने स्वतन्त्रता खाेसेर प्राधिकरणले पूँजी, अनुभव र कार्य कुशलताकाे दृष्टीकाेणले समेत ज्यादै कमजाेर रहेका स्वदेशी पुनर्बीमककाे काँधमा जाेखिम केन्द्रीकृत गर्न खाेजेपछि जीवन बीमक रुष्ट बनेका छन् ।
जीवन र निर्जीवन बीमा कम्पनीकाे चुक्ता पूँजी दाेब्बर वृद्धि गर्नका लागी प्राधिकरणले २०७८ चैत १० गते पूँजी वृद्धि सम्बन्धी नयाँ प्रावधान ल्याएकाे थियाे । २०७९ चैत्र महिनाभित्र अर्थात् १२ महिनाकाे छाेटाे अवधिभित्र चुक्ता पूँजी वृद्धि गर्नुपर्ने बाध्यात्मक अवस्थामा पूँजी वृद्धि गर्ने विकल्पकाे रूपमा बीमकले आपसमा गाभ्ने गाभिने विकल्प राेजे । परिणाम स्वरुप जीवन बीमककाे संख्या १९ बाट १४ वटामा सीमित हुन पुगेकाे छ । मर्जर राेजे पनि अधिकांश जीवन बीमकले न्यूनतम चुक्ता पूँजी जुटाउन सकेका छैनन् ।
नेपालकाे बीमा इतिहासमै जीवन बीमा कम्पनीहरूबीच पहिलाे मर्जर सूर्य लाइफ र ज्योति लाइफ इन्स्याेरेन्सबीच भएकाे थियाे । यी दुई कम्पनी आपसमा गाभिएर सूर्यज्योति लाइफ इन्स्याेरेन्समा २०७९ पुष ७ गते रुपान्तरण भइसकेका छन्। सानिमा लाइफ र रिलायन्स लाइफ इन्स्योरेन्स एक आपसमा गाभिएर २०७९ पुष ७ गते देखि सानिमा रिलायन्स लाइफ, प्राइम लाइफ, गुराँस लाइफ र युनियन लाइफ इन्स्योरेन्स एक आपसमा गाभिएर २०८० बैशाख २६ गते देखि हिमालयन लाइफ र प्रभु लाइफ र महालक्ष्मी लाइफ इन्स्योरेन्स एक आपसमा गाभिएर २०८०असर २९ गते देखि प्रभु महालक्ष्मी लाइफ इन्स्योरेन्समा रुपान्तरण भै कारोबार गरिरहेका छन्।