काठमाडौं । महालक्ष्मी लाइफ इन्स्योरेन्स कम्पनीका प्रमुख कार्यकारी अधिकृत रमेश कुमार भट्टराईले अघिल्लो आर्थिक वर्ष २०७७/७८ मा तलब भत्ता सुविधा बापत ७५ लाख ४४ हजार रुपैयाँ बुझेका छन् । भट्टराईले यस भन्दा अघिल्लो आर्थिक वर्षमा ७५ लाख ५२ हजार रुपैयाँ बुझेका थिए । गएको वर्षको भन्दा यस वर्ष तलब तथा अलाउन्सेल घटेको छ । यस भन्दा अगाडीको वर्षमा नियम अनुसार कर्मचारी बोनस बापत ३ लाख ७० हजार बुझेका थिए । तर उनले आर्थिक वर्ष २०७७/७८ मा मुनाफा घटेका कारण बोनस पाउन सकेनन् । यस वर्ष कम्पनीले उनको जीवन बीमा बापत तीन लाख ८८ हजार रुपैयाँ बीमा शुल्क भुक्तानी गरिदिएको छ ।
त्यस्तै नायव प्रमुख कार्यकारी अधिकृत कमल पन्थीले ४७ लाख २८ हजार रुपैयाँ प्राप्त गर्दा अर्का नायव प्रमुख कार्यकारी अधिकृत रामेश्वर श्रेष्ठले ४५ लाख ४७ हजार रुपैयाँ प्राप्त गरेका छन् ।
कम्पनीको अध्यक्ष मनोरञ्जन रमण शर्माले बैठक भत्ता तथा अन्य सुविधा बापत जम्मा ५१ हजार रुपैयाँ मात्रै प्राप्त गरेका छन् । अर्का सञ्चालक महन राज जोशी र सुरेश सापकोटाले ४०/४० हजार रुपैयाँ बुझेका छन् ।
कम्पनीले आज ५ औ वार्षिक साधारणसभा आह्वान गरेको छ । साधारणसभाले प्रभु लाइफ सँगको मर्जरको अन्तिम स्वीकृति लिदैछ । साधारणसभाबाट मर्जर प्रकृयाँ टुङ्गिने वित्तीकै कम्पनीले असार अन्तिम सातामा एकिकृत कारोबार गर्ने भएको छ ।
