काठमाडौं । शेयर बजारका लगानीकर्ताले आन्दोलन घोषणा गरेका छन् । अर्थमन्त्री डा. प्रकाशशरण महतले आगामी आर्थिक वर्षको बजेटमा शेयर बजारलाई प्रभावित पार्ने गरि करको व्यवस्थाहरु गरेको भन्दै लगानीकर्ताहरुले विरोध जनाउदै आएका छन् ।
यसै सन्दर्भमा शेयर बजारको विषयमा निरन्तर खवरदारी गर्दै आइरहेका तिलक कोइरालाले आन्दोलन नै घोषणा गरेका छन् । उनले भोलि विहान १० बजे कमलपोखरीमा लगानीकर्ताहरुलाई आन्दोलनमा सहभागी हुन आह्वान गरेका छन् ।
तिलक कोइराला समुहले भोलि नै आन्दोलनका थप कार्यक्रमहरु सार्वजनिक गर्नेछ । कोइराला शेयर बजारको सुधारको माग गर्दै पटक पटक आमरण अनसन नै बसिसकेका छन् । आजै लगानीकर्ताका संघ संघठनले प्रेश विज्ञप्ती जारी गर्दै आर्थिक विधेयकमा भएको व्यवस्थालाई हटाउने माग सहित आन्दोलनको चेतावनी नै दिइसकेका छन् ।
लगानीकर्ताले अर्थमन्त्रीलाई यस विषयमा बुझाउन खोजे पनि उनले लगानीकर्ताले उल्टै नबुझेको भन्दै आरोप लगाएका छन् । विभिन्न कार्यक्रमहरुमा अर्थमन्त्री महतले केहि लगानीकर्ताहरुले बजार घटाउने नियतका साथ गलत प्रचार गरेको आरोप समेत लगाउन भ्याइसकेका छन् ।
