काठमाडौं । नेपाल बीमा प्राधिकरणले प्रणालीमा समस्या आए पछि अभिकर्ताको विवरण अध्यावधिक गर्ने समय एक साता थपेको छ । बीमा कम्पनीहरुले फागुन २२ गतेसम्म अभिकर्ताको विवरण अध्यावधिक गर्न पाउने बीमा प्राधिकरणका कार्यकारी निर्देशक राजुरमण पौडेलले जानकारी दिए ।
आज सर्भर डाउन हुँदा पनि करिव १० हजार अभिकर्ताको विवरण प्रणालीमा इन्ट्री भएको प्राधिकरणका सहायक निर्देशक शम्भु प्रसाद मिश्रले जानकारी दिए । हालसम्म बीमा कम्पनीहरुले एक लाख ११ हजार अभिकर्ताको विवरण अध्यावधिक गरेको उनले बताए । अव बीमा कम्पनीहरुले कुनै पनि हालतमा फागुन २२ गते भन्दा पछाडीको म्याद नपाउने उनको भनाइ छ ।
यदि फागुन २२ गतेसम्म पनि पुराना अभिकर्ताको विवरण प्रणाली इन्ट्री नभएमा उनिहरुको लाइसेन्स नै नविकरण नहुने प्राधिकरणले जनाएको छ । एउटा अभिकर्ताले एउटा मात्रै बीमा कम्पनीमा काम गर्न पाउने कानुनी व्यवस्थाको कार्यान्वयनका लागि प्राधिकरणले यो काम गरिरहेको छ । बीमा कम्पनीले आफ्ना अभिकर्ताको विवरण प्रणालीमा इन्ट्री गरे सँगै दोहोरो अभिकर्ताको विवरण पत्ता लगाउने छ । दोहोरो अभिकर्ताको विवरणलाई परीक्षण गरे पछि अभिकर्ताले नविकरण गर्दा कुनै एउटा कम्पनी मात्रै छनोट गर्न बाध्य बनाइनेछ ।
हाल बीमा क्षेत्रमा पुराना र नयाँ गरेर २ लाख हाराहारी सक्रिय बीमा अभिकर्ता रहेका छन् । विगतका वर्षमा बीमा कम्पनीहरुले मनलाग्दी अभिकर्ताको विवरण बुझाउने गरेका थिए । तर अनलाइन प्रणालीको विकास सँगै अभिकर्ताको वास्तविक संख्या देखिन थालेको छ । अझै दोहोरो अभिकर्ताको व्यवस्था हट्ने वित्तीकै अभिकर्ताको संख्या थप घट्ने छ ।
