काठमाडौं । सगरमाथा इन्स्योरेन्स कम्पनीका प्रमुख कार्यकारी अधिकृत चंकी क्षेत्रीको वार्षिक तलब सुविधा ९८ लाख ५७ हजार रुपैयाँ रहेको छ । क्षेत्रीले गत आर्थिक वर्ष २०७८/७९ मा तलब भत्ता बापत ७३ लाख ९९ हजार रुपैयाँ प्राप्त गरेका छन् । उनले यस भन्दा अघिल्लो आर्थिक वर्षमा तलब भत्ता बापत जम्मा ५२ लाख ५० हजार रुपैयाँ मात्रै बुझेका थिए ।
त्यस्तै नियम अनुसार कर्मचारी बोनस २४ लाख ५८ हजार रुपैयाँ प्राप्त गरेका छन् । बोनस शेयर भन्दा अघिल्लो आर्थिक वर्षको भन्दा घटेको छ । अघिल्लो आर्थिक वर्षमा क्षेत्रीले २६ लाख ८७ हजार रुपैयाँ बोनस प्राप्त गरेका थिए । यसरी तलब भत्ता र बोनस सहित ९८ लाख ५७ हजार रुपैयाँ बुझेका हुन् । यस भन्दा अघिल्लो आर्थिक वर्षमा ७९ लाख ३७ हजार रुपैयाँ प्राप्त गरेका थिए । उच्च व्यवस्थापन तहका कर्मचारीले भने तलब भत्ता बापत एक करोड ८९ लाख रुपैयाँ बुझेका छन् ।
कम्पनीले गत आर्थिक वर्षमा सञ्चालक समितिका पदाधिकारीहरुलाई बैठक भत्ता सुविधा बापत २१ लाख १४ हजार रुपैयाँ उपलब्ध गराएको छ । शेयरधनीहरुको हकमा भने चुक्ता पूँजी एक अर्ब ३३ करोडको १२.४० प्रतिशत बोनस शेयर उपलब्ध गराउदैछ । अर्थात शेयरधनीहरुले १६ करोड ५३ लाख रुपैयाँ बराबरको बोनस शेयर र बोनस शेयरको कर प्रयोजनका लागि ८७ लाख तीन हजार रुपैयाँ नगद लाभांश दिदैछ ।
कम्पनीले यहि फागुन ११ गते २६ औ वार्षिक साधारणसभा आह्वान गरेको छ । साधारणसभा लैनचौर बैङ्क्वेट लैचचौरमा विहान ११ बजे गर्दैछ । माघ २६ गतेसम्म कायम शेयरधनीले साधारणसभामा भाग लिन पाउने छन् । साधारणसभा प्रयोजनका लागि माघ २७ गते बुक क्लोज गरिसकेको छ ।
