काठमाडौं । प्रशासनिक कारवाहीको विरोध गर्दै फागुन २ गते काठमाडौंको नयाँ बसपार्क क्षेत्रमा भएको प्रदर्शनका क्रममा त्यस क्षेत्रका व्यापारिक मल, सुपर मार्केट तथा अन्य व्यवसायमा भएको तोडफोड एवं लुटपाटका घटनाप्रति नेपाल उद्योग वाणिज्य महासंघको गम्भीर ध्यानाकर्षण भएको छ । महासंघ त्यस्ता कार्यको घोर निन्दा एवं भत्र्सना गरेको छ ।
लोकतन्त्रमा विरोध प्रदर्शन गर्न पाउने जति अधिकार छ त्यतिनै जनताले आफ्नो जीउ धन र सम्पत्तिको सुरक्षा गर्न पाउने अधिकार पनि छ । जनताको सम्पत्तिको खुलेआम तोडफोड, लुटपाट हुनु सोभनिय नभएको भन्दै यस्तो कार्य कानूनी राज्यमा दण्डनीय हुनुपर्ने महासंघको धारणा रहेको छ ।
कुनै पनि विरोधका आडमा जवरजस्ती कानून हातमा लिई हुने यस्ता घटनालाई समयमै नियन्त्रण गर्नेतर्फ राज्यको ध्यान जान सकेन र त्यस्ता तत्वलाई कानूनको दायरामा ल्याई कडाभन्दा कडा कारवाही गर्न सकिएन भने जुनसुकै समयमा अन्यत्र पनि यस्ता घटना नदोहोरिएलान भन्न नसकिने महासंघले जनाकएको छ ।
उक्त घटनामा संलग्न व्यक्तिहरूलाई तत्काल कानूनी कारवाही हुनुपर्ने तर्फ नेपाल उद्योग वाणिज्य महासंघले नेपाल सरकार तथा सम्बन्धित निकायको गम्भीर ध्यानाकर्षण गराएको छ । साथै व्यवसायीका लुटिएका सामान अविलम्व फिर्ता गराउन समेत माग गरेको छ ।
