काठमाडौं । उपप्रधानमन्त्री तथा गृहमन्त्री रबि लामिछानेले नतिजामुखि काम गर्न अप्ठेरो भएको बताएका छन् । मंगलबार संसदमा बोल्दै गृहमन्त्री लामिछानेले जताततै आफ्नो मान्छे सिफारिस गर्ने प्रवृत्ति अन्त्य नगरेसम्म प्रणालीमा सुधार नहुने र नतिजामुखि काम गर्न नसकिने बताएका हुन् ।
पुराना दलले राज्यको संयन्त्रलाई थिलथिलो बनाएर राखेकोले काम गर्नेहरुलाई कानून पालना गराउने भन्दा आदेश पालना गर्न बाध्य पारिएका छन् । तसर्थ जनताले चाहेको र आशा राखे अनुरुप काम गर्न अहिलेका राज्य संयन्त्रलाई सुधारको आवश्यक परेकोले आफू निरन्तर लागि परिरहेको बताए ।
गृहमन्त्री लामिछानेले भने, ‘ती राज्यका मान्छेहरुबाट प्रणाली सुधारेर सिष्टममा काम गर्न दिने कुरालाई तपाई हामी प्रतिबद्ध हुन सक्यौं भने पनि आधा काम सकिनेछ । र, आम नागरिकले महसुस गर्नेछन् । चाहे त्यो क्रसरको विषयमा होस् चाहे फरार सांसदका विषयमा हुन, चाहे आन्दोलनरत अधिकारकमीहरुका कुरा हुन्, गृह मन्त्रालय अत्यन्त संवेदनशील भएर काम गरिरहेको छ । नतिजा आउन समय लाग्ने भएको छ भने राज्यको संयन्त्रलाई चलाइएको छ, गिजोलिएको छ, तिनलाई ट्रयाकमा ल्याउन नसक्दा ढिलो भएको हो, त्यस्ता ठाउँलाई ठीक गरेर केही दिनभित्र निर्णयमा पुग्छौं।’
यसैगरी, सबैलाई आफ्नै सिडिओ, डिएसपी र एसपी चाहिएको छ । यसरी सबैतिर आफ्नो चाहिने प्रबृत्ति हाबी गर्दा प्रणाली सुधारमा तपाइहरुको योगदान के भन्दै रोष्टमबाट उने प्रश्न गरेका थिए । वहसको विषयलाई केन्द्रित नबाउँदा नयाँ जोश र जाँगरका साथ साँसद भवन छिरेका नयाँ सांसद र जनतालाई सांसदहरुको कुरा सुन्न उत्साह नहुने उनले बताए ।
