काठमाण्डौं । स्वास्थ्य बीमा बोर्डले कार्यालय संचालनको लागी काठमाण्डौ उपत्यकांको मुख्य बजार क्षेत्रमा घर बहालमा खोजे पनि नपाएपछि दोश्रो पटक सार्वजनिक सूचना प्रकाशन गर्नु परेको छ ।
बोर्डले टेकुस्थित कार्यालय साँघुरो र अव्यवस्थित भएको कारण देखाउँदै फराकिलो ठाउँमा कार्यालय सार्नको लागी ५० देखि ६० कोठे घर बहालमा लिने तयारी गरेको छ ।
बोर्डले कोटेश्वर, बानेश्वर, बबर महल, थापाथली, त्रिपुरेश्वर, टेकु, जमल,कमलादी, हात्तिसार, नक्साल, डिल्लीबजार, ज्ञानेश्वर, मैतीदेवी, अनामनगर, पुरानो बानेश्वर क्षेत्रमा घर बहालका लागी प्रस्ताव गर्न आह्वान गरेको छ । त्यसैगरी ललितपुर महानगरपालिकाको कुपण्डोल, पुलचोक, सानेपा आसपासको क्षेत्रमा समेत कार्यालय संचालनका लागी उपयुक्त भवन उपलब्ध भए निवेदन पेश गर्न आह्वान गरेको छ । बोर्डले शिलबन्दी निवेदनमा बहालमा दिने क्षेत्रफल, प्रति वर्गफुट बहाल दर र अन्य शर्तहरु समेत स्पष्ट खुलाएर पेश गर्नको लागी आग्रह गरेको छ ।
बहाल लगाइने भवनमा १० वटा चारपाङग्रे र २५ वटा दुई पाङग्रे सवारी साधन पार्किङ गर्न सकिने सुविधा समेत भएको हुनुपर्ने शर्त रहेको छ । असोज ३० गते दोश्रो पटक १५ दिने सार्वजनिक सूचना प्रकाशन गरेको बोर्डले निवेदन पेश गर्ने अन्तिम दिन सार्वजनिक बिदा भए भोली पल्ट कार्यालय समयभित्र निवेदन पेश गर्न सकिने उल्लेख गरेको छ ।
