काठमाडौं । निर्जीवन बीमाकम्पनीले भदौ महिनामा मात्रै तीन अर्ब ३९ करोड रुपैयाँ बीमा शुल्क आर्जन गरेका छन् । गत साउनमा कम्पनीहरुले चार अर्ब ४७ करोड रुपैयाँ बीमा शुल्क आर्जन गरेका थिए । कम्पनीको व्यवसाय साउनको तुलनामा भदौमा ३१ प्रतिशतले घटेको छ ।
सरकारले कित्ताकाट घटाउदा घरजग्गाको कारोबार ठप्प छ । अर्को तर्फ बैंक वित्तीय संस्थाले घर कर्जा प्रवाह गर्न सकेका छैनन् । यसले गर्दा पनि भदौमा निर्जीवन बीमा कम्पनीको व्यवसाय खुम्चिएको हो ।
भदौ महिनामा सर्वाधिक धेरै राष्ट्रिय बीमा संस्थाले ३६ करोड १८ लाख रुपैयाँ बीमा शुल्क आर्जन गरेको छ । कम्पनीले गत साउनमा ८४ करोड २८ लाख रुपैयाँ बीमा शुल्क आर्जन गरेको थियो । कम्पनीले सरकारी स्तरबाट हुने बीमाको नविकरण मार्फत उक्त बीमा शुल्क आर्जन गरेको थियो । तर भदौमा सोहि अनुपातमा व्यवसाय नभित्रिदा समग्र निर्जीवन बीमा कम्पनीहरुकै व्यवसाय घटेको देखिएको हो ।
भदौमा मात्रै सर्वाधिक दोस्रो धेरै व्यवसाय गर्नेमा शिखर परेको छ । शिखरले ३१ करोड ७१ लाख रुपैयाँ आर्जन गरेको छ । कम्पनीले गत साउनमा ३५ करोड ५२ लाख रुपैयाँ आर्जन गरेको थियो । तेस्तै तेस्रो धेरै बीमा शुल्क आर्जन गरेको नेकोले भदौमा २६ करोड ८६ लाख आर्जन गर्दा साउनमा भने २७ करोड १० लाख थियो । चौथो धेरै व्यवसाय भित्र्याएको सगरमाथाले भदौमा २६ करोड ११ लाख आर्जन गर्दा साउनमा ३२ करोड ६२ लाख रुपैयाँ आर्जन गरेको छ । त्यस्तै सिद्धार्थले साउनमा ३० करोड आर्जन गर्दा भदौमा भने २३ करोड मात्रै छ ।
यसरी सर्वाधिक धेरै व्यवसाय गरेका कम्पनीकै व्यवसायमा गिरावट आएको छ । नयाँ तर्फको अजोडले भने भदौमा १५ करोड १६ लाख आर्जन गरेको छ भने साउनमा १६ करोड थियो । यस महिनामा सबै भन्दा कम जनरल र सानिमा जरलको छ । जनरलले ६ करोड ६३ लाख आर्जन गर्दा सानिमाको भने ८ करोड २५ लाख मात्रै छ । यि दुबै कम्पनी मर्जरको अन्तिम घडीमा छन् ।