काठमाडौं । १०० बराबर ८७ को स्वापमा सहमति गर्दै साना किसान विकास लघुवित्त वित्तीय संस्था लिमिटेड र आरएमडिसी लघुवित्त वित्तीय संस्था मर्जरमा जाने उद्देश्यले शुक्रवार समझदारी पत्रमा हस्ताक्षर भएको छ । मर्जर पश्चात आरएमडिसी लघुवित्तको १०० कित्ता शेयर मर्जर पश्चात बन्ने संस्थाको ८७ कित्ता शेयर कायम हुनेछ भने साना किसानका शेयरधनीको कित्तामा परिवर्तन हुने छैन् । शुक्रवार कारोवार बन्द भए पश्चात सानाकिसानको शेयर मूल्य १०१८ हुँदा आरएमडिसीको ८३४ बजार मुल्य थियो ।
मर्जर पश्चात बन्ने नयाँ सस्थाको नाम साना किसान आरएमडीसी लघुवित्त वित्तीय संस्था लिमिटेड हुने सहमति भएको छ । साना किसानको तर्फबाट अध्यक्ष खेमबहादुर पाठक र आरएमडिसी लघुवित्त वित्तीय संस्थाको तर्फबाट अध्यक्ष सुजाता जोशीले मर्जरको समझदारीपत्रमा हस्ताक्षर गरेका थिए ।
वित्तीय रुपमा कस्ता छन् दुई कम्पनीहरु ?
गत आर्थिक वर्ष ७८/८९को चौथो त्रैमासको आधारमा साना किसान लघुवित्त वित्तीय सस्थाको चुक्ता पुँजी १ अर्ब ५६ करोड छ भने आरएमडिसीको चुक्ता पुँजी १ अर्ब २४ करोड छ । संचित नाफा सहितको जगेडाकोषमा साना किसानको २ अर्ब ५९ करोड संचित हुँदा आरएमडिसीको २ अर्ब ८ करोड संचित छ।
साना किसानको शेयरधनी कोष ४ अर्ब १६ करोडको हुँदा आरएमडिसीको ३ अर्ब ३२ करोडको छ । मर्जर पश्चात करिव साढे ७ अर्बको शेयरधनीकोष हुने छ ।
गत आर्थिक वर्षको चौथो त्रैमासको आधारमा हेर्दा गत वर्ष साना किसानले ७० करोड खुद नाफा गर्दा आरएमडिसीको खुद नाफा ३५ करोड रहेको छ । साना किसानको ४५ रुपैयाँ प्रति शेयर आम्दानी हुँदा आरएमडिसीको २८ रुपैयाँ छ।
त्यस्तै, साना किसानको प्रति शेयर नेट्वर्थ २६६ रुपैयाँ हुँदा आरएमडिसीको २६८ रुपैयाँ छ ।