काठमाडौं । नेपाल बैंकर्स एसोसिएशनले प्रदान गरेको साउन महिनाको तथ्याङ्क अनुसार तीन वाणिज्य बैंकको सिडी रेसियो ९० प्रतिशत माथि पुगेको छ । सेञ्चुरी कमर्सियल बैंक, नबिल बैंक र नेपाल बैंकको सिडी रेसियो ९० प्रतिशत माथि छ । नेपाल राष्ट्र बैंकका अनुसार वाणिज्य बैंकहरुको सिडी रेसियो ९० प्रतिशत भन्दा मुनी हुनु पर्नेमा बैंकहरुको औसत सिडी रेसियो नै ८८ प्रतिशत माथि पुगेको छ । सिडी रेसियो ९० माथि हुने बैंकलाई कर्जा प्रवाह गर्न अप्ठेरो हुन्छ ।
२६ वाणिज्य बैंक मध्ये सेञ्चुरी कर्मसियल बैंकको सिडी रेसियो सबै भन्दा धेरै ९१ दशमलव ६३ प्रतिशत रहेको छ भने नबिल बैंकको ९० दशमलव ९२ प्रतिशत र नेपाल बैंकको ९० दशमलव ७२ प्रतिशत रहेको छ ।
बैंकहरुको औसत सिडी रेसियो ८८ दशमलव ०७ रहेको छ । सबै भन्दा कम सिडी रेसियो प्रभु बैंकको ८२ दशमलव ८८ प्रतिशत रहेको छ भने नेपाल एसबिआई बैंकको ८४ दशमलव ६४ प्रतिशत रहेको छ ।
सिडी रेसियो कम हुँदा बैंकसँग कर्जा प्रवाह गर्ने तरल रकम धेरै हुन्छ भने सिडी रेसियो ९० हुँदा कर्जा प्रवाह गर्न बैंकलाई समस्या हुने देखिन्छ ।
वाणिज्य बैंकहरुको सिडी रेसियो बढ्दै जानुको कारण वाणिज्य बैंकबाट निक्षेप घट्दै जानु हो । साउन महिनामा मात्र वाणिज्य बैंकबाट १ खर्ब ८ अर्बले निक्षेप घटेको छ । असार मसान्तसम्म ४५ खर्ब ४१ अर्ब रहेको निक्षेप साउन मसान्तसम्म आउँदा ४४ खर्ब ३३ अर्ब पुगेको छ । निक्षेप आक्रामक रुपमा घट्दा र कर्जा प्रवाह स्थीर हुँदा बैंकको सिडी रेसियो टाइट हुँदै गएको हो ।
