काठमाडौं । हिमालयन जनरल इन्स्योरेन्स कम्पनी र एभरेष्ट इन्स्योरेन्स कम्पनीको मर्जर पछिको एकिकृत कारोबार साउन एक गतेदखि शुभारम्भ गर्ने सहमति भएको छ । दुबै कम्पनीले मर्जरको प्रस्ताव यहि असार २ गते विशेष साधारणसभा बोलाएका छन् ।
साधारणसभाले दुई कम्पनी विचको मर्जरको सहमतिलाई स्वीकृति सहित पारित गरे सँगै एकिकृत कारोबारको लागि बाटो खुला हुनेछ । दुबै कम्पनीका सञ्चालक तथा संस्थापक लगानीकर्ताहरु विच अधिकाम्स विषयमा सहमति जुटिसकेको छ ।
विशेष साधारणसभा तथा संझौतापत्रमा एक आपसमा गाभिने भनिए पनि हिमालयनले एभरेष्टका सम्पुर्ण दायित्वहरुलाई सकार्नेछ । यो भनेको हिमालयनले एभरेष्टलाई प्राप्ती गरे जतिकै हो । मर्जर पछि लाइसेन्स नम्बर, प्यान नम्बर, कम्पनी रजिस्ट्रार कार्यालयको नम्बर सबै हिमालयन कै कायम हुने । नाम ‘हिमालयन एभरेष्ट’ राखिए पनि सम्पत्ती तथा दायित्वहरु हिमालयन इन्स्योरेन्स अन्तर्गत नै हुने भएकाले यो प्राप्ति नै हो ।
हिमालयन जनरल इन्स्योरेन्स कम्पनी तथा एभरेष्ट इन्स्योरेन्स कम्पनी एक आपसमा गाभिए पछि गठन हुने संचालक समितिमा एभरेष्टको तर्फबाट चयन भइ आउने सञ्चालकहरुलाई पदस्थापन गर्नु पर्नेछ । यसरी बन्ने सञ्चालक समितिको कार्यकाल मर्जर पछिको पहिलो साधारणसभासम्म कायम रहन्छ । त्यस पछि नयाँ सञ्चालक समितिको निर्वाचन हुन्छ ।
दुई कम्पनीको स्वाप रेसियो एक बरारबर ०.८५ हुने सहमित भएको छ । मर्जर पछि हिमालयन इन्स्योरन्सका शेयरधनीहरुको शेयर पूँजी यथावत रहनेछ । भने एभरेष्टका शेयरधनीको शेयर संख्या १५ प्रतिशतले घट्ने छ । हाल हिमालयनको चुक्ता पूँजी एक अर्ब १७ करोड रुपैयाँ छ भने एभरेष्टको एक अर्ब २५ करोड रुपैयाँ छ । मर्जर पछि चुक्ता पूँजी २ अर्ब २३ करोड रुपैयाँ पुग्नेछ ।
