काठमाडौं । नेपाल पुनर्बीमा कम्पनीले सञ्चालनमा रहेका बीमा कम्पनीका प्रमुख कार्यकारी अधिकृतहरुलाई फकाउन थालेको छ । यसै क्रममा कम्पनीले यहि फागुन १९ गतेदेखि २१ गतेसम्ममा सम्पुर्ण बीमा कम्पनीका प्रमुख कार्यकारी अधिकृतहरुलाई चितवनको सौराहमा लैजाने भएको छ ।
नेपाल पुनर्बीमा कम्पनीले सम्पुर्ण जीवन तथा निर्जीवन बीमा कम्पनीहरुको प्रमुख कार्यकारी अधिकृतहरु सँग पुनर्बीमा सम्बन्धी गोष्ठी आयोजना गर्ने भएको छ । पुनर्बीमाले फागुन १९, २० र २१ गते चितवनको एक लजमा यस्तो कार्यक्रम आयोजना गर्ने भएको हो ।
फागुन १९ गते ग्याल्पो ल्होछार र २१ गते शनिवार सहित दुई दिनको सार्वजनिक रहेको छ । पुनर्बीमाले बजारमा नयाँ प्रतिस्पर्धी कम्पनी आए सँगै अहिले भइरहेको व्यवसाय टिकाउन साथै अझै व्यवसाय बढाउने हिसावले सम्पुर्ण कम्पनीहरु सँग सम्बन्ध बनाउन खोजेको हो । विदेशी पुनर्बीमा कम्पनीहरुले पनि नेपाली बीमा कम्पनीका प्रमुख कार्यकारी अधिकृतहरुलाई विदेश भ्रमण तथा सेमिनारमा लैजाने गरेका छन् । पुनर्बीमा कम्पनीको व्यवसायको आधार नै बीमा कम्पनीहरु भएको हुँदा उनिहरुले कम्पनीहरुलाई फकाउने गरेका हुन् ।
सरकारी लगानीको नेपाल पुनर्बीमा कम्पनीले यस्तो कुरालाई खासै ध्यान दिन सकेको थिएन । तर बजारमा हिमालयन रिइन्स्योरेन्स कम्पनी आइसकेको छ । हिमालयन रिले कम्पनीहरु सँग सम्बन्ध बनाउदै व्यवसाय तानिरहेको छ । हिमालयनले विदेशी पुनर्बीमा कम्पनीकै रणनीति अख्तियार गर्न थाले सँगै नेपाल पुनर्बीमाले पनि पछ्याउन थालेको हो ।
