काठमाण्डौं । सानिमा बैंक लिमिटेडले उपत्यकाभित्र शाखा संजाल बिस्तारलाई रणनीतिकरुपमा अघि बढाएको छ । सानिमा बैंकको व्यवस्थापनले पछिल्लो समयमा रणनीतिकरुपमा शाखा बिस्तारलाई जोड दिएको हो ।
एक महिनाको अवधिभित्र ललितपुर जिल्लामा मात्र सानेपा, मंगलबजार, बालकुमारी, हरिसिद्धि, डोलाहिटीसहित पाँचवटा नयाँ शाखा थपिएका छन् । यसअघि ललितपुरको भैंसेपाटी, सातदोबाटो, कुमारीपाटी, कुपण्डोल, थसिखेल, एकान्तकुनामा शाखा संचालनमा रहेका थिए । बैंक व्यवस्थापनले काठमाण्डौं उपत्यकाभित्र संचालनमा रहेका २६ वटा बिस्तारित काउण्टरलाई व्यवसाय र रणनीतिकरुपमा शाखा कार्यालयमा स्तरोन्नती गरिरहेको छ ।
काठमाण्डौं उपत्यकाभित्र वा मोफसलमा शाखा कार्यालय आवश्यक भएको नयाँ स्थानमा समेत शाखा थप्ने योजनालाई पनि निरन्तरता दिएको छ । त्यसैगरी काठमाण्डौंंको कलंकी, टेकु, न्यूरोड, बानेश्वर, ग्वार्को, नक्साल, चुच्चेपाटी, सामाखुसी, सोह«खुट्टे, महाराजगंजमा शाखा रहेकोमा गोकर्णेश्वरमा गत साता शाखा स्थापना गरेको छ । भक्तपुरको बोडेमा पनि हालैमात्र शाखा कार्यालय संचालनमा ल्याएको छ । भक्तपुर जिल्लाको गठ्ठाघर र ठिमीमा शाखा संचालन गरिरहेको यो बैंक्ले बालकोट चोकमा पनि चाँडै नै नयाँ शाखा खोल्दैछ । अहिले कार्यालयको लागी आवश्यक पूर्वाधार निर्माण कार्य जारी छ । ९७ स्थानमा एटिएम मेशिन जडान गरेको बैंकको शाखा संख्या ११४ नाघेको छ ।
यद्यपि बैंकको वेभसाइटमा शाखा संजालबारे अध्यावधिक विवरण उपलब्ध छैन । जम्मा ८८ वटा शाखाको नाम,ठेगाना र सम्पर्क नम्बर लगायतको विवरण उल्लेख गरिएको छ । उपलब्ध विवरण अनुसार २०७७ माघसम्ममा काठमाण्डौं उपत्यकाभित्र १६ वटा शाखा र १७ वटा एक्सटेन्स काउण्टर संचालनमा रहेको थियो । वेभसाइटमा बैंकले शाखा संजालबारे जानकारी अध्यावधिक नगरिएका कारण बैंकका ग्राहकलाई आफू नजिकको शाखा वा एक्सटेन्सन काउण्टरबारे जानकारीको अभावमा भौतिकरुपमा बैंकिङ सेवा लिन कठिनाई भइरहेको छ ।
