दशैका लागि पैसा जोहो गर्न खोज्दा शेयर बजारमा ६१ अंकको पहिरो

काठमाडौं। लगानीकर्ताले शेयर बजारबाट पैसा जोहो गर्न खोज्दा साताको पहिलो दिनमै ६१.२७ अंकको पहिरो गएको छ । दशै नजिकिनुका साथै पहिलो त्रैमाशिक अवधिको कर भुक्तानीका लागि आवस्यक पैसा जुटाउन खोज्दा आइतबार सुरुदेखिनै शेयर बजार घट्न थालेको थियो ।

गत साता झण्डै ६ सयको करेक्सन पछि सुधारिन थालेको थियो । ६ सयको करेक्सन तीन दिनमै साढे दुईसले सुधार हुँदा लगानीकर्ताले खर्च जोहो गर्नका लागि शेयर बिक्री गर्न थालेका छन् । यसै क्रममा आइतबार नेप्से सूचक २.१७ प्रतिशतले घटेर २७५८ मा झरेको छ । आज ८ वटा कम्पनीको मात्रै शेयर मूल्य बढेको छ भने बाँकी सबैको मूल्य घटेको छ । कारोबार रकम पनि ६ अर्ब ५० करोड रुपैयाँमा सिमित भएको छ ।

सबैभन्दा धेरै फाइनान्सको शेयर मूल्यमा गिरावट आएको छ । फाइनान्सको सूचक ५.८९ प्रतिशतले घटेको छ भने हाइड्रोपावरको ४.३ प्रतिशतले तल झरेको छ । हाइड्रोपावर र विकास तथा फाइनान्सको शेयर बिक्री गरेर लगानीकर्ताहरु बाणिज्य बैंकको शेयरमा आकर्षित भएका छन् ।

गत साता तीन बाणिज्य बैंकहरुले लाभांश घोषणा गरेकाले यस साता बाणिज्य बैंकहरुको शेयरमा उछाल आउने विश्लेषण गरिएको थियो । तर बाणिज्य बैंकको सुधार तीन दिन पनि टिक्न सकेन । अवको दुई तीन महिना बाणिज्य बैंकहरुले लाभांश घोषणा गर्ने, साधारणसभा गर्ने तथा लाभांश वितरण गर्ने सिजन हो । त्यसैले गर्दा केहि दिनदेखि बाणिज्य बैंकहरुको शेयरमा सर्वाधिक आकर्षण देखिएको हो ।

शेयर बजारलाई पछिल्लो समय बैंकहरुको व्याजदर तथा तरलता अभावले सबैभन्दा धेरै प्रभावित पारिरहेको छ । सिडी रेसियोका कारण बाणिज्य बैंकहरु कर्जा लगानी गर्नै नसक्ने अवस्थामा पुगेका छन् । कर्जा लगानी गर्न नसक्ने भएकाले बैंकहरुले मंहगो व्याजदरमा निक्षेप उठाइरहेका छन् । यस बाहेक यस साता दशै खर्च जोहो गर्नका लागि पनि सप्लाइ आउने देखिन्छ ।

प्रतिक्रिया दिनुहोस्

सम्बन्धित समाचार