काठमाडौं । बीमा समितिबाट पुनर्बीमा कम्पनीको लाइसेन्स पाएको हिमालयन रि- इन्स्योरेन्सले कम्पनी रजिष्ट्रारको कार्यालयमा दर्ता गरेको छ । समितिले जेठ १७ गते प्रारम्भिक आशय पत्र प्रदान गरेको हो । लाइसेन्स पाए सँगै कम्पनीले जेठ २३ गते दर्ता गरेको हो । पब्लिक कम्पनीको रुपमा दर्ता भएको हिमालयन रि इन्स्योरेन्सको दर्ता नम्बर २ लाख ६३ हजार ६१८ (२६३६१८) रहेको छ ।
यस कम्पनीमा नेपाल उद्योग बाणिज्य महासंघका वर्तमान तथा निवर्तमान गरि तीन जना अध्यक्ष रहेका छन् । वर्तमान अध्यक्ष शेखर गोल्छा, निवर्तमान अध्यक्ष भवानी राणा र पुर्व अध्यक्ष पशुपति मुरारकाको लगानी रहेको छ । त्यस्तै नेपाल उद्योग परिसंघका वर्तमान अध्यक्ष तथा लक्की ग्रुपका सतिश मोर, शंकर ग्रुपका शाहिल अग्रवाल र सुलभ अग्रवाल, के.एल. दुगड ग्रुपका विकास दुगड, एम.भी. दुगड ग्रुपका विवेक दुगड, लक्की ग्रुपका रोहित गुप्ता लगायतको लगानी रहेको छ ।
कम्पनीको जारी पूँजी १० अर्ब रुपैया तोकिएको छ । जस मध्ये सर्वसाधारणका लागि तीन अर्ब रुपैयाँ प्राथमिक शेयर जारी गरिने भएको छ ।
