काठमाडौं । नेपाल राष्ट्र बैंकले माघ १ गतेदेखि एटिएमहरुमा नयाँ नियम लागू गरेको छ । जस अनुसार दोस्रो बैंकको एटिएम प्रयोग गर्दा प्रत्येक पटकमा २० रुपैयाँ शुल्क लाग्ने व्यवस्था गरेको छ ।
केन्द्रीय बैंकका अनुसार आफ्नै बैंक खाता भएको एटिएम मेशिनबाट रकम निकाल्दा पैसा लाग्ने छैन । तर, आफ्नो खाता भएको बाहेकका अन्य बैंक तथा वित्तीय संस्थाहरुको एटिएम प्रयोग गर्दा २० रुपैयाँ शुल्क लाग्ने भएको छ ।
नेपाल राष्ट्र बैंकले आज जनाए अनुसार इन्टरनेट तथा मोबाइल बैंकिङ प्रयोग गर्ने सेवाग्राहीको लागि पनि शुल्क तोकेको छ भने ग्राहकले मोबाइल तथा इन्टरनेट बैंकिङको युजरनेम तथा पासवर्ड भुलेमा आफै रिसेट गर्न सक्ने व्यवस्था मिलाउन बैंक तथा वित्तीय संस्थाहरुलाई निर्देशन दिएको छ ।
कोभिडबाट बच्न विद्युतीय कारोबारलाई प्रोत्साहन दिँदै केन्द्रीय बैंककै निर्देशन अनुसार जुनसुकै एटिएमबाट रकम निकाल्दा शुल्क नलाग्ने व्यवस्था गरिएको थियो । अब कोभिडको प्रभाव न्यून भएको भन्दै शुल्क लाग्ने व्यवस्था गरिएको हो ।
