काठमाडौं । कोरोना भाइरसको जोखिम बढेपछि बैंकका काउन्टरमा नआउन सर्वसाधारणलाई अपिल जारी गरेको छ । बाणिज्य बैंकहरुको छाता संगठन नेपाल बैंकर्स संघले हिजो एक अपिल जारी गर्दै सर्वसाधारणलाई बैंकका काउन्टरमा नआउन आग्रह गरेको हो ।
संघले सकेसम्म सर्वसाधारणलाई घरैबाट डिजिटल माध्यमबाट कारोबार गर्न आग्रह गरेको छ । संघले कोरोना महामारीबाट बच्न तथा जोखिम न्यूनिकरणको लागि भन्दै यस्तो आग्रह गरेपनि पछिल्ला केही दिनदेखि बैंकका काउन्टरहरु कोभिडबाट असुरक्षित हुँदै गएपछि यस्तो आग्रह गरेको हो । स्रोतका अनुसार दर्जनभन्दा बढि बैंकका थुप्रै कर्मचारीहरुमा कोरोना भाइरसको संक्रमण भइसकेको छ ।
संघले बैंकका काउन्टरहरु सुरक्षित प्रमाणित गर्न सकिने अवस्था नरहेको भन्दै यस्तो आग्रह गरेको हो । बैंकले शाखामा आउन समस्या भएमा सम्बन्धित शाखामा टेलिफोन गरी आफ्नो बारेमा जानकारी लिन सकिने समेत जनाएको छ ।
कोभिडको जोखिम बढेर केही बैंकहरुले जोर बिजोर प्रणालीबाट शाखा कार्यालय सञ्चलान गर्न थालेको सन्दर्भमा संघको यस्तो अपिल बाहिर आएको हो । पछिल्लो समय राजधानी काठमाडौंसहित देशैभरि कोभिड–१९ को महामारी बढ्ने क्रममा रहेको छ । राजधानी काठमाडौंमा दैनिक १०० भन्दा बढि र देशैभरिमा दैनिक पाँच सय हाराहारीमा मानिसहरु संक्रमित भइरहेका छन् ।
