काठमाडौं । एनएमबि बैंकले साउन २६ गते सोमबारदेखि लागू हुने गरी नयाँ ब्याजदर सार्वजनिक गरेको छ । बैंकले साधारण निक्षेपमा ३ प्रतिशतदेखि अधिकतम ५ प्रतिशत ब्याजदर कायम गरेको छ । त्यसैगरी व्यक्तिगत मुद्दती निक्षेपमा अधिकतम ७।७५ प्रतिशत मात्र ब्याज दिने जनाएको बैंकले संस्थागत मुद्दतीमा ७ प्रतिशत मात्र ब्याज दिने जनाएको छ ।
नवीकरण हुने संस्थागत निक्षेपमा भने बैंकले ७ दशमलव १ प्रतिशत ब्याज दिनेछ । ५ वर्ष वा सोभन्दा बढी अवधिका लागि मुद्दती निक्षेप गर्ने व्यक्तिलाई भने बैंकले ८ दशमलव २५ प्रतिशत ब्याज दिने जनाएको छ ।
त्यस्तै, कर्जातर्फ एनएमबिले कर्जा तर्फको ब्याजदर न्यूनतम १० दशमलव ९५ प्रतिशतबाट सुरु हुने जनाएको छ । यस्तो कर्जाको अधिकतम ब्याजदर १३ दशमलव ९५ प्रतिशत हुने बैंकले जानकारी दिएको छ ।
बैंकले विभिन्न शीर्षकका ५० भन्दा बढी किसिमका कर्जाहरुमा आधार दरमा २ देखि ५ प्रतिशत प्रिमियम थप गरी ब्याजदर निर्धारण हुने बताएको हो । बैंकको आधार दर ८ दशमलव ९५ प्रतिशत छ । यसै आधार दरका आधारमा माथिका कर्जाका व्याजदर निर्धारण हुनेछन्।
बैंकले घर कर्जा र घरको छानामा राखिने सोलारमा भने फरक ब्याजदर घोषणा गरेको छ। बैंकका अनुसार कम्तीमा १० वर्षका लागि लिइने सोलार कर्जामा सिधै ९ दशमलव ९९ प्रतिशतदेखि ११ दशमलव ९९ प्रतिशत ब्याज लाग्नेछ ।
त्यस्तै, बैंकले घर कर्जा लिनेहरुका लागि कर्जा अवधि नभई २ वर्षसम्म ८ दशमलव ९९ प्रतिशत निश्चित ब्याजदर निर्धारण गरेको छ भने ५ वर्षसम्म ११ प्रतिशत ब्याज स्थिर हुने जनाएको छ। यो कर्जाको अवधि भने सेवाग्राहीसँगको सम्झौता अनुसारको हुने बैंकले जानकारी दिएको छ ।
