काठमाडौं । नेपालमा सञ्चालनमा रहेका ७० वटा बैंक तथा वित्तीय संस्थामा खोलिएको दुई करोड ६० लाख वटा खातामा मौज्दात भएको ६ खर्ब ८९ अर्ब रुपैयाँ निक्षेप बीमा गरिएको छ । उक्त निक्षेप बीमा समितिको नियमनमा बीमा गरिएको नभई निक्षेप तथा कर्जा सुरक्षण कोषमार्फत बीमा गरिएको हो ।
कोषका अनुसार अघिल्लो वर्षको तुलनामा गत वर्ष ८६ अर्ब रुपैयाँ निक्षेप बीमा बृद्धि भएको छ । सरकारले बाणिज्य बैंक, विकास बैंक, फाइनान्स कम्पनीमा प्राकृतिक व्यक्तिको नाममा खोलिएको खाताको न्यूनतम ३ लाख रुपैयाँको बीमा सुरक्षण अनिवार्य गरेको छ । उक्त व्यवस्था अनुसार सबै बैंक वित्तीय संस्थामा खोलिएका खाताहरुमा न्यूनतम ३ लाख रुपैयाँ सम्मको निक्षेप बैंक टाट पल्टेमा वा अन्य कुनै कारणले भुक्तानी गर्न असमर्थ भएमा कोषले भुक्तानी गर्ने गरी बीमा गरिएको हो । आव २०७५।०७६ सम्ममा दुई लाखको सीमा रहेकोमा आव २०७६।०७७ को बजेटमार्फत बृद्धि गरी तीन लाख पुर्याइएको थियो । गत आवमा दुई वटा लघुवित्त कम्पनीले समेत निक्षेप बीमा गराएको कोषले जनाएको छ ।
त्यस्तै, कोषले एक अर्ब २४ करोड रुपैयाँ बराबर ७४२ जना साना तथा मझौला ऋणको समेत बीमा गरिएको जनाएको छ । कोषका सिईओ विष्णुबाबु मिश्रका अनुसार करिब १२ हजार ऋणीको साढे अर्ब भन्दा बढि कर्जाको बीमा सुरक्षण गरिएको छ ।
सरकारले साना निक्षेपकर्ताको हितका लागि यस्तो व्यवस्था लागू गरेको हो । तर, निक्षेप बीमा बीमा कम्पनीमा नभई कोषमार्फत गरिदै आएको छ । नेपालमा विभिन्न नाममा बीमा सम्बन्धी गतिविधिहरु हुँदै आएका छन् । संसदको अर्थ समितिमा छलफलको क्रममा रहेको बीमा ऐन २०७५ को विधेयकमा सबै बीमालार्ई एकीकरण गर्न नसकेको भन्दै सांसदहरुले आलोचना गरेपछि थप छलफल हुने भएको छ ।
