काठमाडौं । शुक्रबार विहान कजास्तानको एउटा विमान दुर्घटनाग्रस्त हुँदा सो जहाजमा सवार १४ जनाको मृत्यु भएको छ भने कम्तीमा ८० जनाको जीवितै उद्धार गरिएको अन्तर्राष्ट्रिय सञ्चार माध्यमहरुले जनाएका छन् ।
चालक दलका सदस्यहरु सहित कूल ९८ जना यात्रु लिएर कजाकस्तानको अल्मेटी विमानस्थलबाट नुरसुल्तानका लागि उडेको बेक एयरको जहाज धावनमार्ग छोडेको एक मिनेटभित्रै दुर्घट्नाग्रस्त हुन पुगेको थियो । हिऊले भरिएको बस्ती नजिकैको खेतमा बजारिएको जहाज टुक्रा टुक्रा भएको छ । यद्यपि जहाजमा आगो नलागेको कारण मानवीय क्षति भने कम भएको छ ।
उडान नं जेड–९२१०० नम्बरको जहाजले एक हजार फिटको उचाई लिएपछि जमिनतर्फ झरेको जनाइएको छ । घाइतेहरु बालबालिका, महिला समेत रहेको जनाइएको छ उनीहरुको स्थानीय अस्पतालमा उपचार भइरहेको छ ।
दुर्घटनाको ठूलो रकम बीमा दावी पर्ने देखिएको छ । यद्यपि ठूलो संख्यामा यात्रुहरुको जीवितै उद्धार गरिएकाले करोडौ रुपैयाँ बीमा दावी भुक्तानी बचेको छ । हवाई दुर्घटना बीमामा पुनर्बीमा कम्पनीमाथि बढि पार पर्नेहुन्छ ।
