काठमाडौं । त्रिभुवन विमानस्थलमा आन्तरिक उडान भर्ने दुई जहाज आपसमा ठोक्किँदा सामान्य दुर्घटना भएको छ । शुक्रबार अपरान्ह अवतरणपछि पार्किङ् वे मा जादै गरेको श्री एयरलाइन्सको जहाजले पार्किङमा रहेको यतिको जहाजलाई ठक्कर दिएको हो । घटनामा कुनै मानवीय तथा ठूलो भौतिक क्षति भएको छैन ।
दुवै जहाजमा सामान्य क्षति भएको विमानस्थलका प्रवक्ता प्रतापबाबु तिवारीले जानकारी दिए । अवतरण पश्चात आन्तरिक टर्मिनलतर्फ पार्किङमा जाने क्रममा श्री एयरलाइन्सको ९एन एएमसी जहाजको पखेटाले सोही टर्मिनलमा पार्किङ गरिराखेको यति एयरलाइन्सको ९एन एएनसी एटिआर जहाजको पुच्छर पट्टिको भागमा ठक्कर दिएको हो ।
घटनाको अनुसन्धान भइरहेको र दोषीलाई कारवाही गरिने नागरिक उड्डयन प्राधिकरणले जनाएको छ ।
