काठमाडौं । नेपाल राष्ट्र बैंकका डेपुटी गभर्नर शिवराज श्रेष्ठमाथि वित्तीय अनियमितता गरेको आरोप लागेको छ । ठूलो रकम चलखेलमा संलग्नता रहेको अभियोगसँगै उनीमाथि कारवाही गर्ने भन्ने हल्ला चलेको छ । एनसेलको लाभांश फिर्ता तथा अजेयराज सुमार्गीको रकम फुकुवालगायतका सम्पत्ति शुद्धिकरण अनुसन्धानमा असहयोग गरेको अभियोग डेपुटी गभर्नर श्रेष्ठमाथि लगाइएको छ ।
श्रेष्ठमाथि लागेको अभियोगको सम्बन्धमा छलफल गर्न नेपाल राष्ट्र बैंकको बोर्ड बैठक बोलाएको छ । आजै बस्ने बैठकमा डेपुटी गभर्नर श्रेष्ठमाथिको अभियोग सम्बन्धमा छलफल हुने बताइएको छ । श्रेष्ठमाथि अर्थमन्त्रालयबाटै कारवाही गर्न अनौपचारिक दवाव परेको बताइएको छ । श्रेष्ठलाई बर्खास्त गर्ने तयारी गरिएको भन्ने समाचारहरु विभिन्न सञ्चार माध्यमहरुले प्रशारण गरिरहेका छन् । यद्यपि तत्काल बर्खास्त हुने सम्भावना भने छैन ।
नेपाल राष्ट्र बैंकको बोर्ड सदस्यमा श्रेष्ठ आफै डेपुटी गभर्नरको हैसियतमा सदस्य छन् । सोही कारण पनि त्यति सजिलै बर्खास्त गर्ने निर्णय गर्न भने सजिलो छैन । आज बस्ने नेपाल राष्ट्र बैंकको बोर्ड बैठकले सो सम्बन्धमा छलफल भने हुने निश्चित छ ।
