काठमाडौं । छिमेक लघुवित्त वित्तीय संस्थाले ४४ दशमलव ३३५४ प्रतिशत लाभांश दिने घोषणा गरेको छ । कम्पनीको मंगलबार बसेको सञ्चालक समिति बैठकले आर्थिक वर्ष २०७५–७६ को नाफाबाट २७ दशमलव ११८६ प्रतिशत बोनस र १७ दशमलव २१६८ प्रतिशत नगद गरी कुल ४४ दशमलव ३३५४ प्रतिशत लाभांश दिने निर्णय गरेको हो ।
कम्पनीले ३२ करोड रुपैयाँ बराबरको बोनस वितरण गर्नेछ । त्यस्तै, २० करोड ३१ लाख ५७ हजार ८९४ रुपैयाँ नगद बाँड्नेछ ।
सञ्चालक समितिको निर्णय अनुमोदनका लागि नेपाल राष्ट्र बैंक र आगामी वार्षिक साधारण सभामा पेश गरिने छिमेकले जनाएको छ । अघिल्लो वर्ष छिमेकले १८ प्रतिशत बोनस सेयर र २२ प्रतिशत नगद गरी कुल ४० प्रतिशत लाभांश दिएको थियो ।
हाल छिमेक लघुवित्तको चुक्ता पुँजी १ अर्ब १८ करोड रुपैयाँ छ । घोषणा गरेको बोनस सेयरपछि पुँजी १ अर्ब ५० करोड रुपैयाँ पुग्नेछ ।
