निर्जीवन बीमा कम्पनी र निर्माण व्यवसायी बीचको मिलेमत्तोमा सरकारी रकम झ्वाम पार्ने गरेको पाईएको छ । कम्पनी र व्यवसायीले नक्कली बिल देखाएर सरकारबाट बढी रकम असुली रहेका छन् ।
निर्माण व्यवसायीले सरकारी संरचना निर्माण गर्दा अनिवार्य रुपमा बीमा गर्नुपर्ने प्रावधान रहेको छ । यसरी व्यवसायीले टेण्डर राख्दा बास्तविक बीमाशुल्क भन्दा बढी रकम राख्ने गरेका छन् । बीमा कम्पनीसँगको मिलेमत्तोमा व्यवसायीले सरकारी कार्यलयमा बुझाउँने रसिद र वास्तविक रसिद फरक फरक बनाउँने गरेको पाईएको छ ।
उदाहरणको लागी व्यवसायीले ५ लाख रुपैयाँ बीमा शुल्क भुक्तानी गर्नुपर्नेमा बीमा कम्पनीसँग नक्कली बिल बनाई सरकारी कार्यलयमा १० लाख रुपैयाँसम्मको बिल देखाउँने गरेको बीमा कम्पनीका एक कर्मचारीले बताए । उनका अनुसार व्यवसायीले सरकारबाट १० लाख असुली गरी कम्पनीलाई ५ लाख रुपैयाँ भुक्तानी गर्छन्, बाँकी रकम कम्पनी र व्यवसायीले बाँडी चुडी खाने गरेको भुक्तभोगीहरु बताउँछन् ।
यस बिषयमा बीमा समिति समेत जानकार छ । तर यस बिषयमा समितिमा हालसम्म कुनै पनि उजुरी नपरेको समितिको भनाई छ । हाल बजारमा सञ्चालनमा रहेका २० वटा निर्जीवन कम्पनीमध्ये तीन वटा कम्पनीले यस्तो खालको काम गर्दै आएको स्रोतले बताएको छ । बजारमा प्रतिस्पर्धा अधिक भएपछि कम्पनीहरुले यस्तो खालको विकल्प समेत अपनाउँने गरेको कम्पनीहरु बताउँछन् ।
