इन्स्योरेन्स खवर/काठमाडौं: नेपाल धितोपत्र बोर्डले केवाइसीमा कडाई गरेसँगै त्यसका प्रभाव सेयर बजारमा देखिएको छ । बोर्डले दुई सात अगाडि नै बैशाख मसान्तभित्र केवाइसी अद्याविधक गर्न निर्देशन दिएको थियो ।
बोर्डको निर्देशन अनुसार नै केवाईसी अपडेट नगर्ने लगानीकर्ताले (जेठ १) आजदेखि सेयर कारोबारमा रोक लगाएको हो ।
सेयरमा कालोधनको आशंका गर्दै आएको धितोपत्र बोर्डले शेयर बजारमा कालोधन तथा अन्य गैरकानूनी सम्पत्ति नभित्र्याउने उद्देश्यले केवाइसीमा नयाँ मापदण्ड तय गरेको थियो ।
केवाइसी अपडेटका लागि बैशाख मसान्तसम्मको समय सीमा तोक्दै त्यसपछि भने सेयर कारोबार गर्न नपाउने कडा निर्देशन जारी गरेको थियो ।
हालसम्म केवाइसी अपडेट नगराएका वा छुटेका लगानीकर्ताहरुको हकमा भने ब्रोकरमा गएर पहिला आफ्नो केवाइसी अपडेट गराउनुपर्ने र त्यसपछि मात्र कारोबारमा सहभागी हुन सकिने धितोपत्र बोर्ड जनाएको छ ।
केवाईसीमा भएको कडाईका कारण मंगलबार सेयर बजार प्रभावित भएको छ । मंगलबार १४३ कम्पनीको १४ करोड ९२ लाख ३९ हजार ९ सय ५५ रुपैयाँको सेयर किनबेच भएको छ ।
आज नेप्से सुचक ४ दशमलव ३२ अंकले घटेर १ हजार ३ सय ३३ दशमलव ८५ अंकले घटेको छ । कारोबारमा आएका अधिकांश समूहमा गिरावट आएपछि मंगलबार बजार परिसुचक ओरालो लागेको हो ।
यसदिन कारोबारमा आएका दश समूहमध्ये ट्रेडिङ, उत्पादन तथा प्रशोधन बाहेकका सबै समूहमा गिरावट आएको छ । जसमध्ये होटल समूह ३२ दशमलव ९५ अंकले, जलविद्युत समूह १३ दशमलव १४ अंकले, विकास बैंक १० दशमलव ९६ अंकले, बीमा समूह १२ दशमलव ७६ अंकले, लघुवित्त समूह ५ दशमलव ६२ अंकले, बैंकिङ समूह ४ दशमलव २८ अंकले, फाइनान्स समूह १ दशमलव ३३ अंकले र अन्य समूह शुन्य दशमलव ५३ अंकले घटेका छन् ।
त्यस्तै ट्रेडिङ समूह ५ दशमलव ४९ अंकले बढेको छ भने उत्पादन तथा प्रशोधन समूह २८ दशमलव १६ अंकले बढेका छन् ।
त्यसैगरी आजको कारोबारमा सबैभन्दा बढी हिमालयन डिस्टीलरीका लगानीकर्ताले कमाएका छन् । कम्पनीको सेयर मूल्य ९ दशमलव ९५ प्रतिशतले बढेको छ । त्यसैगरी जनउत्थान सामुदायिक लघुवित्त विकास बैकका लगानीकर्ताले सर्वाधिक गुमाएका छन् । कम्पनीको सेयर मूल्य ४ दशमलव ९१ प्रतिशतले घटेको छ ।
