इन्स्योरेन्स खबर/काठमाडौंः चालू आवको तेश्रो त्रैमासमा सिटिजन लाइफ इन्स्योरेन्सले ७ करोड ५५ लाख ५९ हजार रुपैयाँ खुद मुनाफा कमाएको छ । अघिल्लो त्रैमासको तुलनामा यो नाफा ४६ दशमलव ७६ प्रतिशतले बढी हो । दोस्रो त्रैमाससम्ममा पाँच करोड १४ लाख रुपैयाँ खुद नाफा आर्जन गरेको थियो ।
१ अर्ब ७५ करोड रुपैयाँ चुक्तापूँजी रहेको सिटिजनले जगेडा कोषमा ८ करोड १० लाख रुपैयाँ राखेको छ । समिक्षा अवधिमा कम्पनीले ४ करोड १९ लाख ८८ हजार रुपैयाँ जीवन बीमा कोषमा सञ्चित गरेको छ ।
३६ हजार ३ सय २ बीमालेखबाट २१ करोड ५५ लाख ३७ हजार रुपैयाँ कुल बीमा शुल्क आर्जन गरेको सिटिजन लाईफले ४ बीमा लेखको २ लाख ५८ हजार रुपैयाँ दाबी भुक्तानी गरिसकेको छ ।
सिटिजन लाइफ इन्स्योरेन्सले ७५ करोड रुपैयाँ बराबरको ७५ लाख कित्ता साधारण सेयर निष्काशन गर्ने प्रस्ताव साधारणसभाबाट पारित गरिसकेको छ । कम्पनीको प्रथम बार्षिक साधारणले कम्पनीले जारी पूँजी दुई अर्ब ५० करोड रुपैयाँको ३० प्रतिशतले सर्वसाधारणमा सेयर जारी गर्ने निर्णय गरेको हो ।
२०७४ साल कार्तिक २ गते लक्ष्मी पूजाको दिनदेखि व्यवसायिक कारोबार शुरु गरेको कम्पनीले हाल ३६ शाखाबाट बीमासेवा प्रदान गर्दै आएको छ ।
