इन्स्योरेन्स खबर/काठमाडौंः जोशी हाइड्रोपावर कम्पनी लिमिटेडले ३ लाख ७१ हजार ४ सय कित्ता सेयर निष्कासन गर्ने भएको छ । कम्पनीले पहिलो चरणमा आयोजना प्रभावित स्थानीय इलाम बासीका लागि जेठ ८ गतेदेखि सेयर निष्कासन गर्ने भएको हो ।
कम्पनीले १०० रुपैयाँ अंकित मुल्यमा ३ करोड ७१ लाख ४० हजार रुपैयाँ बराबरको ३ लाख ७१ हजार ४ सय कित्ता सेयर निष्कासन गर्न लागेको हो । आईपीओमा इलाम नगरपालिका, साखेजुङ, पुवामजुवा, र माईपोखरीका स्थानियबासिन्दाले आवेदन दिन पाउने भएका छन् । इच्छुक आवेदकले जेठ ८ गतेदेखि छिटोमा जेठ २२ र ढिलोमा असार ११ गतेसम्म आवेदन दिन सक्नेछन् । सेयरमा न्युनतम ५० कित्तादेखि अधिकतम १ हजार ८ सय कित्तासम्म आस्बासदस्य सबै बैंक तथा वित्तीय संस्थाबाट आवेदन दिन सक्ने कम्पनीले जनाएको छ ।
कम्पनीको सेयर निष्कासन तथा विक्री प्रबन्धकमा सिद्धार्थ क्यापिटल लिमिटेड रहेको छ । कम्पनीको आईपीओलाई इक्राले ग्रेड ५ रेटिङ प्रदान गरेको छ ।
कम्पनीको पहिलो आयोजनाको रुपमा ३ मेगावाटको अपर पुवा १ आयोजना सञ्चालनमा रहेको छ । बिसं २०७१ माघ १ गतेबाट यो आयोजनाबाट व्यवसायिक रुपमा विद्युत् उत्पादन भएको नेपाल विद्युत् प्राधिकरण पावर ट्रेड डिपार्टमेन्टमा उल्लेख गरिएको छ ।
