काठमाडौं, वैशाख १४ । यो साता सेयर बजार परिसुचक नेप्से ८१ दशमलव २७ अंकले घटेको छ । गत साता १०० अंकले उकालो लागेको नेप्से यो साता ८१ अंकले घटेर १ हजार ३ सय ५७ दशमलव २२ अंकको बिन्दुमा आइपुगेको छ ।
नेप्से परिसुचक घटेको भएपनि साताभर कारोबार रकममा भने वृद्धि देखिएको छ । यो साता बजारमा १८२ कम्पनीको ४ अर्ब ६९ करोड ६१ लाख ७९ हजार रुपैयाँ बराबरका एक करोड १ लाख ८५ हजार कित्ता सेयर खरिदबिक्री भएका छन् । यो रकम गतसाताको भन्दा १४ दशमलव ८६ प्रतिशतले बढी हो । गतसाता बजार ४ अर्ब ८ करोड ८७ लाख रुपैयाँ बराबरको सेयर कारोबार भएको थियो ।
गतसाता लगातार बढेको बजारमा लगानीकर्ता प्रोफिट बूक गर्न लाग्दा बजारमा त्यसको प्रभाव परेको देखिन्छ । ठूला लगानीकर्तादेखि सर्टटर्ममा खेल्ने लगानीकर्ताले पनि प्रोफिट बुक गर्न लाग्दा बिक्री चाप परेको सेयर कारोबारीहरु बताउँछन् ।
यो साता कारोबारमा आएका सबै समूहमा गिरावट आएको छ । जसमध्ये बीमा समूह ४५२ दशमलव ८३ अंकले घटेको छ । त्यस्तै होटल १६६ दशमलव ४६ अंक, विकास बैंकको सुचक ११० दशमलव ७३ अंक, लघुवित्त समूह १०२ दशमलव ७ अंक, जलविद्युत समूह १३७ दशमलव ६ अंक, बैंकिङ समूह ६ दशमलव ३३ अंक, फाइनान्स समूह ३६ दशमलव १५ अंक, उत्पादन तथा प्रशोधन समूह ८७ दशमलव ५७ अंक, व्यापार समूह ३ दशमलव २९ अंक र अन्य समूह ३५ दशमलव ४२ अंकले घटेका छन् ।
क वर्गका कम्पनीहरुको मापन गर्ने सेन्सेटिभ इन्डेक्स पहिलो दिनको तुलनामा १७ दशमलव ०५ अंकले घटेर २८७ दशमलव ०६ अंकमा आइपुगेको छ ।
कारोबारमा नेपाल बैंक अगाडि
यो साता कारोबार रकमका आधारमा नेपाल बैंक लिमिटेड अगाडि देखिएको छ । बैंकको १९ करोड १५ लाख १० हजार रुपैयाँ बराबरको ५ लाख २४ हजार कित्ता सेयर किनबेच भएका छन् । त्यसैगरी कारोबार संख्याको आधारमा प्रिमियर इन्स्योरेन्स कम्पनी अग्रस्थानमा रहेको छ । कम्पनीको १ हजार ५ सय ५ वटा कारोबार भएको देखिन्छ ।
