काठमाडौं चैत्र १८। रसुवागढी र सान्जेन जलविद्युत आयोजनाले निष्काशन गरेको पहिलो र दोस्रो चरणको प्राथमिक शेयरको बाँडफाँड आज २ बजे हुने भएको छ। दुबै कम्पनीले पहिलो चरणमा संचयकर्ताको लागि फागुन ११ देखि ३० गतेसम्म प्राथमिक शेयर निष्काशन गरेका थिए भने दोस्रो चरणमा चैत्र ५ देखि १३ गतेसम्म निष्काशन गरेका थिए।
दुबै कम्पनीले शेयर बाँडफाँड गरेपछि शेयर बापतको पैसा कटाएर बाँकी रकम बिहीबारबाट आवेदकले फिर्ता पाउने बिक्री प्रवन्धकहरुले जनाएका छन । बैंकहरुले आवेदन दिएपछि पैसा लक गर्ने र बाँडफाँडपछि परेको शेयरको पैसा कटाउँदै नपरेको पैसा छुट्याउन समय लाग्ने हुँदा बिहीबारसम्ममा रकम फिर्ता हुने भएको हो।
रसुवागढीले कर्मचारी सञ्चय कोषका कर्मचारीहरुलाई ६ लाख ८४ हजार २ सय १० कित्ता र संस्थापक सङ्गठित संस्थाका कर्मचारीहरुलाई २३ लाख ९४ हजार ७ सय ३५ कित्ता आइपीओ जारी गरेको थियो ।
त्यस्तै साञ्जेनले कर्मचारी सञ्चय कोषका कर्मचारीहरुलाई ३ लाख ६५ हजार कित्ता र संस्थापक शेयर धनि संस्थाका कर्मचारीहरुका लागि १२ लाख ७७ हजार ५ सय कित्ता साधारण शेयर जारी गरेको हो ।
आइपिओमा परेको आवेदनको आधारमा सञ्चयकर्ताले न्यूनतम ३० र अधिकतम ४० कित्ता पाउने सेयर पाउने भएका छन् । यस्तै, संस्थापक (नेपाल विद्युत प्राधिकरण, चिलिमे जलविद्युत कम्पनी र स्थानीय संघ–संस्था) र ऋणदाता (कोष) का कर्मचारीले औसत १ सय ५० कित्ता पाउने देखिएको छ ।
यस्तै, ऋणदाता (कोष) का कर्मचारीको हकमा न्यूनतम ५० कित्ता र बढीमा एक हजार कित्ताका लागि आवेदन दिन पाउने व्यवस्था गरेको थियो । न्यूनतम ५० कित्ता आवेदन दिन पाउने व्यवस्था भए पनि बढी आवेदन परेका कारण दामासाहीले बाँडफाँड गर्दा सञ्चयकर्ताले बढीमा ४० कित्तासम्म पाउने भएका छन् ।
