काठमाडौं, चैत्र ०९ , बीमा कम्पनीहरुमा पुरुषको नेतृत्व हावी भए पनि बीमा गर्ने बिषयमा महिला बढी सचेत रहेको पाइएको छ । नेपाल राष्ट्र बैंकले गरेको एक अध्ययनले बीमा प्रति महिला बढी सचेत भएको देखाएको हो । केन्द्रीय बैंकले ‘विप्रेषण प्राप्त गर्ने घरपरिवारको बचत तथा लगानी प्रवृत्ति’सम्बन्धी गरेको अध्ययन अनुसार महिला घरमूली भएको परिवारमा ३२.७ प्रतिशतले बीमा गरका छन् । तर, पुरुष घरमूली भएको परिवारमा २६.१ प्रतिशतले मात्रै बीमा गरेको उक्त अध्ययनले देखाउछ ।
महिलाहरूले कुनै पनि जोखिम आफैं बहन गर्न नचाहने हुनाले यस्तो देखिएको राष्ट्र बैंकले जनाएको छ । साथै महिलाहरुमा घरायसी सम्बन्धी बढी जिम्मेवारी हुने र उक्त बिषयमा भविष्यमा कुनै घटना भए पनि कुनै समस्या नआसोस भनेर महिला बढी सचेत भएको बंैकको भनाई छ । अध्ययनले कुल बिमित घरपरिवारमध्ये ९४ प्रतिशतले जीवन बीमा र ६ प्रतिशतले निर्जीवन बीमा गराएको देखाएको छ ।
बीमाले मानिसको जीवनमा अचानक आइपर्ने आर्थिक जोखीमको भार कम गर्न सहयोग गर्छ । आर्थिक समस्या कुनै पनि समयमा पर्न सक्छ, जसका लागि मानिस मानसिक तथा आर्थिक रूपमा तयार नभएको हुन सक्छ । त्यसैले, त्यस्तो अवस्थामा सुरक्षित रहन जीवन बीमा गर्नु आवश्यक छ । त्यससमा पनि महिलाका लागि जीवन बीमा झनै आवश्यक रहेको बीमकहरू बताउँछन् ।
