बेइजिङ। चीनको स्वास्थ्य बीमा क्षेत्रमा ठगी विरुद्धको अभियानले जनवरी २०१८ देखि अक्टोबर २०२१ सम्म भएको ठगीबाट गुमेको करिब ७.९३ अर्ब अमेरिकी डलर ( ९ खर्ब ५९ अर्ब रुपैयाँ) असुल उपर गरेको छ।
राष्ट्रिय स्वास्थ्य सेवा सुरक्षा प्रशासन (एनएचएसए), जनसुरक्षा मन्त्रालय र राष्ट्रिय स्वास्थ्य आयोगले संयुक्त रूपमा गत अप्रिलमा यो अभियान शुरु गरेको थियो। चिकित्सा बीमा धोखाधडीलाई लक्षित गर्ने राष्ट्रिय अभियानले २३ लाख भन्दा बढी चिकित्सा संस्थाहरूको निरीक्षण गरेको थियो।
सिन्ह्वा समाचार एजेन्सीका अनुसार निरिक्षण गरिएकामध्ये १० लाख चिकित्सा संस्था कारवाहीमा परेका छन्। तीन हजार ९७० वटा मुद्दा छानबिन भई राष्ट्रिय आधारभूत चिकित्सा बीमा कोषले १४२ चिकित्सा संस्थासँगको सेवा सम्झौता र ६१ संस्थासँगको सम्झौता समेत खारेज गरेको छ । ठूलो परिमाणमा ठगी फेला परेपछि यो अभियानलाई थप एक वर्ष निरन्तरता दिइने एनएचएसएले जानकारी दिएको छ। एजेन्सी
