काठमाडौं । स्वास्थ्य बीमा बोर्डले सरकारी स्वास्थ्य संस्थामा विशेषज्ञ सेवा प्रदान गर्न पहल थालेको छ।
बीमा बोर्डले एक सूचना जारी गर्दै बोर्डमा सेवा प्रदायक संस्थाका रुपमा आबद्ध भएका सामुदायिक तथा निजी अस्पतालहरुले सरकारी आधारभूत वा प्रादेशिक अस्पतालहरुमा नियमित बहिरङ्ग (ओपीडी) विशेषज्ञ सेवा प्रदान गर्न पहल थालेको हो। हप्तामा ३ दिन नजिकैको सरकारी आधारभूत वा प्रादेशिक अस्पतालहरुमा विशेषज्ञ सेवा प्रदान गर्न सामुदायिक तथा निजी अस्पतालहरुसँग सम्झौता गरी असार मसान्तसम्म iec@hib.gov.np मा पठाउन बीमा बोर्डले आग्रह गरेको छ।
सम्झौतापछि सोहीबमोजिम सेवा प्रदान गर्न बीमा बोर्डको कार्यकारी निर्देशकस्तरको असार १४ गतेको निर्णयबाट निर्देशन दिइएको छ।
त्यस्ता सामुदायिक तथा निजी अस्पतालमध्ये १०० शय्यासम्मको अस्पतालले हप्तामा १ दिन, २०० शय्यासम्मको अस्पतालले हप्तामा २ दिन र ३०० शय्या वा सोभन्दा माथिका अस्पतालले हप्तामा ३ दिन नजिकको आधारभूत था प्रादेशिक अस्पतालहरुमा नियमित बहिरङ्ग विशेषज्ञ सेवा प्रदान गर्नुपर्नेछ।
