काठमाडौं । लघु जीवन र निर्जीवन बीमा कम्पनीले पछिल्लो तीन वर्षको अवधिमा २ अर्ब ५ करोड १४ लाख रूपैयाँ संकलन गर्दा ४४ करोड ५७ लाख रूपैयाँ दाबी भुक्तानी गरेका छन्।
निर्जीवन बीमकले आ.व. २०७९/८० देखि २०८१/८२ सम्ममा १७ करोड ७० लाख रूपैयाँ दाबी भुक्तानी गरेका छन् । यसैगरी जीवन बीमकले आ.व. २०७७/७८ को असारदेखि यो अवधिमा कुल २६ करोड ८७ लाख रूपैयाँ दाबी भुक्तानी गरे ।
लघु जीवन बीमकको बीमाशुल्क आम्दानीः
नेपाल बीमा प्राधिकरणको वार्षिक प्रतिवेदन अनुसार, आ.व. २०७७/७८ को अन्तिम महिनाबाट व्यवसाय सुरु गरेका लघु जीवन बीमकले आ.व. २०७७/७८(असार मात्र) यता चार वर्षको अवधिमा कुल १ अर्ब १ करोड ३४ लाख रूपैयाँ कुल बीमाशुल्क आम्दानी गरेका छन् ।
पहिलो वर्ष रू.२ लाख मात्र कुल बीमाशुल्क रकम संकलन गरेका थिए । त्यसपछि आ.व. २०८०/८१ र आ.व. २०८१/८२ क्रमिक रूपमा बढेर रू.१६ करोड ९८ लाख र रू.८४ करोड ३४ लाख संकलन भएको छ।
लघु जीवन बीमकको बीमाशुल्क आम्दानीको श्रोतमा लघु बीमा, लघु वित्त र सहकारीको कर्जा सुरक्षा प्रयोजनका लागि जारी गरिएको जीवन बीमालेख र वैदेशिक रोजगारी बीमालेख मुख्य हुन् । पछिल्लो वर्षमा बीमाशुल्क संकलन उल्लेख्य बढ्नुको एउटा कारण वैदेशिक रोजगार बीमालेखवापतको व्यवसायमा हिस्सा प्राप्त गर्नुपनि हो।
लघु जीवन बीमकको दाबी विवरणः
व्यवसाय सुरु गरेको प्रथम वर्ष भएको आ.व. २०७९/८० बीमा दाबीको विवरण नभएता पनि आ.व. २०८०/८१ मा ७९ वटा दाबी संख्या को रु.१ करोड १९ लाख र आ.व. २०८१/८२ क्रमिक रूपमा बढेर जम्मा २ हजार १०९ दाबी संख्यामा रु.२५ करोड ६८ लाख भुक्तानी भएको थियो । लघु जीवन बीमकले ५ वटा बीमालेख वापत रु.९ लाख भुक्तानी गर्न बाँकी रहेको देखिन्छ।
लघु निर्जीवन बीमकको बीमाशुल्क आम्दानीः
आ.व. २०७९/८० को अन्तिम महिनाबाट व्यवसाय सुरु गरेका लघु निर्जीवन बीमकहरूले आ.व. २०८१/८२ सम्ममा कुल १ अर्ब ३ करोड ८० लाख रूपैयाँ बीमाशुल्क संकलन गरेका छन् । निर्जीवन बीमकको व्यवसायमा मोटर बीमाको हिस्सा सर्वाधिक छ।
लघु निर्जीवन बीमा दाबी विवरणः
व्यवसाय सुरु गरेको पहिलो वर्ष भएको आ.व. २०७९/८० बीमा दाबीको विवरण नभएता पनि आ.व. २०८०/८१ मा १६४ वटा दाबी संख्यामा रू.१ करोड ४६ लाख र आ.व. २०८१/८२ क्रमिक रूपमा बढेर जम्मा १ हजार ७५४ दाबी संख्यामा रू.१६ करोड २४ लाख भुक्तानी भएको थियो । आ.व. २०८१/८२ मा जम्मा १ हजार २४ दाबी बीमालेख वापत रू.७ करोड ६९ लाख भुक्तानी गर्न बाँकी रहेको छ ।
