काठमाडौं । स्वास्थ्य बीमा बोर्डले स्वास्थ्य बीमा कार्यक्रम अन्तर्गत बीमित बिरामीलाई उपचार सेवा प्रदान गरेका स्वास्थ्य संस्थालाई छैठाैं किस्तावापत २ अर्ब १८ करोड रूपैयाँभन्दा धेरै रकम सोधभर्ना गरेको छ । बोर्डले कुल ३४९ स्वास्थ्य संस्थालाई बीमावापतको रकम सोधभर्ना गरेको हो।
बोर्डका अनुसार छैठाैं किस्ताको ८० प्रतिशत रकमवापत कुल २ अर्ब १८ करोड २९ लाख ९६ हजार रूपैयाँ दाबी भुक्तानी दिइएको हो । बोर्डले सञ्चालक समितिको गत असार ११ गतेको निर्णय अनुसार कुल ३४९ स्वास्थ्य संस्थालाई थप दाबी रकम उपलब्ध गराएको हो ।
बोर्डले यसअघि गत जेठ २० गते पाँचाैं किस्ता दाबी अन्तर्गतको १५ प्रतिशत रकमवापत ५९ करोड १७ लाख रूपैयाँ दाबी भुक्तानी दिएको थियो। त्यसअघि पाँचाैं किस्ता अन्तर्गत गत बैशाख २३ गते दाबी वापत ३ अर्ब ३५ करोड २९ लाख ५० हजार रूपैयाँ स्वास्थ्य संस्थाहरूलाई भुक्तानी गरेको थियो ।
