काठमाडौं । जीवन बीमकको नयाँ व्यापार साढे २७ प्रतिशतले बढेको छ। नेपाल बीमा प्राधिकरणले सार्वजनिक गरेको तथ्यांकले यस्तो देखाएको हो।
हाल सञ्चालनमा रहेका १४ वटा जीवन बीमा कम्पनीले चालु आर्थिक वर्षको मंसिरसम्म १२ अर्ब ४७ करोड १ लाख रुपैयाँ प्रथम बीमाशुल्क (नयाँ व्यापार) संकलन गरेका छन्। अघिल्लो वर्ष यही अवधिसम्म कम्पनीहरुले ९ अर्ब ७६ करोड ७५ लाख रुपैयाँ प्रथम बीमाशुल्क संकलन गरेका थिए। यो बीमाशुल्क वैदेशिक रोजगारबाहेकको हो।
सर्वाधिक नयाँ व्यापार भित्र्याउनेमा नेपा नेपाल लाइफ रहेको छ भने वृद्धिदरका हिसाबले सन नेपाल लाइफ अगाडि छ।
चालु आर्थिक वर्षको मंसिरसम्म नेपाल लाइफले ३ अर्ब २१ करोड १३ लाख रुपैयाँ प्रथम बीमाशुल्क संकलन गरेको छ। अघिल्लो वर्ष यही अवधिसम्म कम्पनीले २ अर्ब ३१ करोड ४१ लख रुपैयाँ प्रथम बीमाशुल्क संकलन गरेको थियो। अघिल्लो वर्षको तुलनामा समीक्षा अवधिमा कम्पनीको नयाँ व्यापार ३८.७७ प्रतिशतले बढेको छ।
दोस्रोमा नेसनल लाइफ रहेको छ। चालु आर्थिक वर्षको मंसिरसम्म कम्पनीले १ अर्ब ८८ करोड ७९ लाख रुपैयाँ प्रथम बीमाशुल्क संकलन गरेको छ। अघिल्लो वर्षको तुलनामा कम्पनीको नयाँ व्यापार २४.३२ प्रतिशतले बढेको छ। अघिल्लो वर्ष मंसिरसम्म कम्पनीले १ अर्ब ५१ करोड ८५ लाख रुपैयाँ प्रथम बीमाशुल्क संकलन गरेको थियो।
धेरै नयाँ व्यापार भित्र्याउने तेस्रो कम्पनीमा लाइफ इन्स्योरेन्स (एलआईसी नेपाल) रहेको छ। यो कम्पनीले अघिल्लो वर्ष मंसिरसम्म ८० करोड ७४ लाख रुपैयाँ प्रथम बीमाशुल्क संकलन गरेकोमा समीक्षा अवधिमा बढेर १ अर्ब २ करोड ७० लाख रुपैयाँ पुगेको छ। कम्पनी नयाँ व्यापार २७.१९ प्रतिशतले बढेको छ।
यसैगरी चालु आर्थिक वर्षको मंसिरसम्म हिमालयन लाइफ ९४ करोड २ लाख रुपैयाँ, सूर्यज्योति लाइफले ९२ करोड ६४ लाख रुपैयाँ, सिटिजन लाइफले ७० करोड ४ लाख रुपैयाँ, एसियन लाइफले ५८ करोड ४० लाख रुपैयाँ र सानिमा रिलायन्स लाइफले ५८ करोड ३५ लाख प्रथम बीमाशुल्क संकलन गरेका छन्। अघिल्लो वर्ष मंसिरको तुलनामा नयाँ व्यापार हिमालयन लाइफको १५.९० प्रतिशत, सूर्यज्योति लाइफको ३२.२९ प्रतिशत, सिटिजन लाइफको २२.१६ प्रतिशत, एसियन लाइफको २४.०९ प्रतिशत र सानिमा रिलायन्स लाइफको २१.३२ प्रतिशतले बढेको छ।
यो वर्ष मंसिरसम्म मेट लाइफले ५० करोड ४७ लाख रुपैयाँ, रिलायबल नेपाल लाइफले ४८ करोड ९३ लाख रुपैयाँ, प्रभु महालक्ष्मी लाइफले ४३ करोड ५ लाख रुपैयाँ, आइएमई लाइफले ४२ करोड ८ लाख रुपैयाँ, राष्ट्रिय जीवन बीमा कम्पनीले ४१ करोड ४६ लाख रुपैयाँ र सन नेपाल लाइफले ३४ करोड ८९ लाख रुपैयाँ प्रथम बीमाशुल्क संकलन गरेका छन्। अघिल्लो वर्ष मंसिरसम्मको तुलनामा नयाँ व्यापार मेट लाइफको ५.०७ प्रतिशत, रिलायबल नेपाल लाइफको १८.९५ प्रतिशत, प्रभु महालक्ष्मी लाइफको २८.९६ प्रतिशत, आइएमई लाइफको १६.५० प्रतिशत, राष्ट्रिय जीवन बीमा कम्पनीको ४६.८० प्रतिशत र सन नेपाल लाइफको ५७.६२ प्रतिशतले बढेको छ।
