काठमाडौं। समयमै भुक्तानी नपाएको भन्दै देशका ठूला अस्पतालले धमाधम स्वास्थ्य बीमा कार्यक्रम अन्तर्गत बीमितलाई स्वास्थ्य उपचार सेवा बन्द गर्न थालेका छन् । सरकारको अत्यावश्यक सेवा अन्तर्गत पर्ने बीमा र स्वास्थ्य उपचार दुबै स्वास्थ्य बीमा कार्यक्रम अन्तर्गत समेटिए पनि स्वास्थ्य बीमा बोर्डले लामो समयदेखि भुक्तानी नदिएको भन्दै एक पछि अर्को गर्दै नाम चलेका अस्पतालले सेवा बन्द गर्न थालेका हुन् ।
काठमाण्डौंको महाराजगंजस्थित त्रिवि शिक्षण अस्पतालले असार १५ गतेदेखि सेवा बन्द गर्ने घोषणा गरेको छ । विराटनगरको नोबेल मेडिकल शिक्षण अस्पताल, विराट मेडिकल कलेज र झापाको विएण्डसी अस्पतालले असार २० गतेदेखि स्वास्थ्य बीमा कार्यक्रम अन्तर्गत उपचार सेवा बन्द गर्ने चेतावनी दिएका छन् ।
बिएण्डसी अस्पताल देशमै सबैभन्दा बढी स्वास्थ्य बीमा कार्यक्रम अन्तर्गत दर्ता भएका बीमितहरुको बसोबास भएको झापा जिल्लामा संचालित छ । बिएण्डसी अस्पतालले सेवा ठप्प पार्दा ठूलो संख्यामा बीमित प्रभावित हुनेछन् । बोर्डका अनुसार झापामा मात्र ५ लाख बीमित दर्ता भएका छन् ।
यसबाहेक धुलिखेल अस्पताल, राप्ती आँखा अस्पताल, राणा अम्बिका आँखा अस्पताल भैरहवाले स्वास्थ्य बीमा बोर्डलाई बक्यौता रकम भुक्तानी नगरे सेवा बन्द गर्ने जानकारी गराइ सकेका छन् ।
सरकारले पर्याप्त जनशक्ति र बजेट उपलब्ध नगराएका कारण समयमै अस्पतालहरुलाई बिरामीको उपचार खर्चवापतको रकम भुक्तानी गर्न नसक्दा समस्या आएको बीमा बोर्डको अधिकारीहरुको प्रतिकृया छ । हामीसँग पर्याप्त जनशक्ति छैन, सरकारले निकासा गरेको रकम पनि अपुग छ,एक उच्च अधिकारीले भने,यस्तो अवस्थामा अपेक्षितरुपमा बोर्डले सेवा प्रवाह गर्न नसकेको हो ।
स्वास्थ्य बीमा बोर्डका अनुसार २०७२ सालदेखिकै १० अर्ब रुपैयाँभन्दा बढी भुक्तानी दिन बाँकी छ । चालू आर्थिक वर्षकै भुक्तानी दिन बाँकी रकम ३ अर्ब रुपैयाँभन्दा बढी छ । आगामी आर्थिक वर्षमा १८ अर्ब रुपैयाँभन्दा बढी खर्च लाग्ने बोर्डको अनुमान छ ।
