काठमाडौं । आगामी दशकमा चीन पुनर्बीमा बजारका लागि विश्वकै दोस्रो ठूलो बजार बन्ने अपेक्षा गरिएको छ । पुनर्बीमा अनिवार्य रूपमा एक प्रकारको बीमा व्यवसाय हो जसमा कुनै पुनर्बीमकले अन्य बीमा कम्पनीहरूलाई सुरक्षाको प्रत्याभूति प्रदान गर्छन् ।
फ्रान्सेली समूहका शीर्ष कार्यकारीले चीनको बढ्दो पुनर्बीमा सुरक्षाको मागले स्कर जस्ता विश्वव्यापी पुनर्बीमकलाई देशमा लगानी बढाउन प्रोत्साहित गरिरहेको प्रतिकृया दिएका छन् । विश्वको छैठाैं ठूलो पुनर्बीमा कम्पनी स्करका सीईओ थिएरी लेगरले चिनियाँ बजारले “अविश्वसनीय वृद्धिको संभावना” बोकेको र स्करको दोस्रो ठूलो बजार बन्ने अपेक्षा गरिएको बताए। लेगरले चाइना डेलीसँगको एक विशेष अन्तर्वार्तामा आगामी १० देखि २० वर्षमा चीनको बलियो आर्थिक वृद्धि सम्भाव्यताका साथै बीमा संरक्षणमा रहेको वर्तमान ठूलो अन्तरले पनि यस क्षेत्रको वृद्धिको सम्भावनालाई बलियो बनाउने र बीमाको माग बढाउने बताए।
चीनको बढ्दो वृद्ध जनसंख्याले जीवन बीमा र स्वास्थ्य बीमा उत्पादनको मागलाई बढाउनेछ। चीनको औद्योगिक क्षेत्रको निरन्तर वृद्धिले सम्पत्ति बीमाको आवश्यकता पनि उत्तिक्कै बढ्नेछ। साथै जलवायु परिवर्तनले प्राकृतिक प्रकोपसँग सम्बन्धित कभरेजको मागलाई बढावा दिने लेगरले बताएका छन् ।
स्करको समग्र व्यवसायमा चीनको योगदान आगामी १० देखि २० वर्षमा कम्तिमा १० देखि १५ प्रतिशतमा पुग्ने अपेक्षा गरिएको छ, चीनमा बीमा शुल्कबाट हुने आम्दानी दोब्बर वा तीन गुणा हुने स्करको अनुमान छ। यो पूर्वानुमान चीनको पुनर्बीमा क्षेत्रको समग्र आकारमा पनि लागू हुन्छ। “म विश्वस्त छु कि चिनियाँ पुनर्बीमा बजार आगामी १० वर्षमा विश्वमा दोस्रो नम्बरमा हुनेछ,” लेगरले भनेका छन्।
